Солҳои охир дар мамлакатамон ба сохтори маҳалла ва васеъ гардондани фаъолияти он эътибори махсус дода мешавад. Тавассути маҳалла ва ҷомеаи шаҳрвандӣ мушкилоти аҳолӣ бартараф карда мешаванд.

Тӯли панҷ соли охир дар сохтор мавқеи раиси маҳалла, фаъоли бонувон, сарвари ҷавонон, ёварони ҳоким ва нозири профилактика баланд бардошта шуда, ҳар яки онҳо вазифаҳои муайяни худро доранд. Чунин андешаҳо дар рафти нишасти матбуотие, ки дар Агентии иттилоот ва коммуникатсияи оммавӣ бо ташаббуси Иттиҳоди маҳаллаҳо баргузор гардид, баён карда шуд. Дар чорабинӣ роҳбари сарраёсати дастгоҳи иҷроияи иттиҳодия Элмурод Қаршиев таъкид кард, ки соли гузашта дар асоси супоришоти Президент ва ҳукумат ба «панҷгонаи маҳалла» ходимони соҳаи иҷтимоӣ ва нозири андоз ҷорӣ карда шуданд, ки имрӯз дар тамоми маҳаллаҳои кишвар онро «ҳафтгонаи маҳалла» ном мебаранд. Фармони Президент аз 21 декабри соли 2023 «Дар бораи чораҳои аз нав баланд бардоштани нақши институти маҳалла дар ҷамъият ва таъмини кори он ба сифати зинаи якум дар ҳаллу фасл намудани мушкилоти аҳолӣ» вазифаҳои муҳими ҳафтгонаи маҳалла, яъне раис, фаъоли бонувон, сарвари ҷавонон, ёварони ҳоким, нозирони профилактика ва андоз муайян карда шуданд. Мувофиқи Қарори Президент «Дар бораи чораву тадбирҳои иловагӣ бобати такомул бахшидани сохтори идоракунӣ дар маҳаллаҳо ва ба роҳ мондани фаъолияти Иттиҳоди маҳаллаҳои Ӯзбекистон» қабул шуд, ки тибқи он дар миқёси ҷумҳурӣ, вилоят ва шаҳру ноҳияҳо роҳбарон ва шуъбаву садоратҳои Иттиҳоди маҳаллаҳо таъсис ёфтанд. Ба зиммаи иттиҳодия вазифа гузошта шуд, ки аъзоёни «ҳафтгона»-ро дар маҳалла муттаҳид созад, мутобиқ ва роҳбарӣ кунад. Инчунин, дар худи маҳалла барои ҳалли мушкилоти аҳолӣ аз бекорӣ, ҷинояткорӣ, низоъҳои оилавӣ, камбизоатӣ ва озод намудан аз муҳоҷирот низоми «ҳафтгонаи маҳалла» таъсис дода шудааст. Имрӯз бо мақсади баланд бардоштан ва иҷрои вазифаҳои ҳафтгонаи маҳаллаҳо корҳои омӯзишӣ ва фаҳмондадиҳӣ бурда мешаванд. — Азбаски солҳои зиёд дар корҳои ҷамоатӣ кор мекунам, аҳамияти ислоҳотеро, ки дар сохтори маҳалла амалӣ мешаванд, хуб дарк мекунам. Мувофиқи қарор ва фармони Президент вазифа ва маҷбуриятҳои ходимони маҳалла дақиқ нишон дода шудаанд, — гуфт сармутахассиси бахши робитаҳои байналхалқӣ Аюбхон Файзуллоев. — Воқеан сохтори «ҳафтгонаи маҳалла» имрӯз ба ҷамоаи пурқувват табдил ёфтааст. Вазифаи мо дар ҳамкорӣ дастгирӣ ва ҳал намудани мушкилоти аҳолӣ мебошад. Далер Азизов, хабарнигори «Овози тоҷик».