Таҳти раёсати Президент Шавкат Мирзиёев маҷлиси видеоселекторӣ оид ба муҳокимаи корҳои дар доираи барномаи ипотека дар соли 2024 анҷомёфта ва нақшаҳо барои соли 2025 оғоз гардид.
Танҳо дар соли гузашта 2 ҳазору 44 бинои бисёрошёна бо зиёда аз 100 ҳазор ҳуҷра бунёд карда шуд. Ҳаҷми манзил барои ҳар як нафар ба 19 метри мураббаъ расид (дар соли 2020 ин нишондиҳанда 16 метри мураббаъ буд).
Дар маҷмӯъ, дар соли 2024 дар кишвари мо 21,4 миллион метри мураббаъ манзили истиқоматӣ ва 19,1 миллион метри мураббаъ иншооти ғайриистиқоматӣ, дар маҷмӯъ 40,5 миллион метри мураббаъ бино ва иншоот бунёд гардид.
Ба шарофати 100 ҳазор манзиле, ки соли гузашта сохта шуд, 350 ҳазор нафар дар соҳаҳои пудрат, идоракунӣ ва сервис, истеҳсоли масолеҳи сохтмонӣ, нақлиёт ва дигар соҳаҳо бо ҷойи кор таъмин шуданд. Дар соҳаҳои мебелсозӣ, техникаи барқӣ, нассоҷӣ ва масолеҳи сохтмонӣ бозори иловагӣ бо арзиши 11 триллион сӯм ба вуҷуд омад.
Барои дастгирии сохтмон дар соли 2024 17 триллион сӯм қарзҳои ипотека ҷудо шуда, ба ширкатҳои сохтмонӣ ва девелоперҳо дар маҷмӯъ 3 триллион сӯм маблағ барои гардиш пешниҳод гардид.
Аз ин рӯ, сарвари давлат таъкид намуд, ки ҳокимон бояд ба сохтмони манзил на танҳо ҳамчун масъалаи иҷтимоӣ ё сохтмонӣ, балки ҳамчун "драйвер"-и асосии рушди иқтисодии минтақа муносибат кунанд.
