Чун дар ҳамаи ҷабҳаҳо дар соҳаи гумруки кишвар низ ислоҳот пайгирона татбиқ мегардад. Хоссатан, содасозии амалиёт дар сохтор натиҷаи матлуб медиҳад.

– Ин ҳамаро дар ҳисоботи солонаи мақомоти гумрук, ки чанде қабл ба вуқӯъ пайваста буд, метавон дид, – гуфт дар суҳбат бо мо котиби матбуоти мақомоти мазкур Ҳусан Тангриев. – Дар брифинги ба ин муносибат баргузоргардида таъкид гардид, ки дар тӯли соли сипаригардида бобати таъмини бехатарии иқтисодии давлатӣ, дастгирии ҳамаҷонибаи соҳибкорон ва иҷрои вазифаву супоришҳои аз ҷониби роҳбари давлат бамиёнгузошташуда чорабиниҳои мушаххасу судманд ба амал татбиқ гардиданд. Аз ҷумла, қариб ба 17 ҳазор соҳибкор бино ба пардохти гумрукӣ 49,6 ҳазор сӯмина имтиёзу преференсияҳо пешбинӣ шуда, ба онҳо имкон доданд, ки 6,6 трлн. сӯмина пардохти гумрукиро дертар пардозанд. Пардохтҳои гумрукӣ барои буҷаи давлатӣ нисбат ба соли аввал 8 фоиз афзуд. Дар натиҷаи такмил додани тартиботи гумрукӣ бо кумаки барномаи ахбор пардохтҳои иловагии барои буҷет ситондашуда 8,4 трлн. сӯмро ташкил дод. Қариб дар 9 ҳазор ҳолат ба гардиши ғайриқонунии 914 млрд. сӯмина амвол, 74 млрд. сӯмина ашёи заргарӣ ва 62 млрд. сӯмина маҳсулоти тамоку нуқта гузошта шуд. Ҳамчунин, дар тӯли соли гузашта ходимони мақомоти гумрук садди роҳи беш аз 1 тонна маводи мухаддир, 554 ҳазор дона моддаҳои психотроп ва таъсиррасон гардиданд. Шояд шумо низ ҳангоми гузаштан аз посгоҳҳои гумрукӣ гувоҳи он шудаед, ки мошинҳои боркаш мисли вагонҳо пушти ҳам қарор гирифта, дурудароз навбат мепоянд. Бар асари содасозии асноди гумрукӣ ва рақамикунонии соҳа навбатпоиҳо хеле коҳиш ёфтаанд. Ин аст, ки сарфи назар аз баромаду даромади 40 млн. нафар мусофирон ва ҳаракати 1,3 млн. автомобили боркаш ва 676 ҳазор вагон тавассути посгоҳҳои гумрукӣ, бе омили инсон, 97 фоизи деклоратсияи амволи содиротӣ ва 75 фоизи амволи воридотӣ ба қайд гирифта шуданд. Дар соли гузашта фаъолияти мақомоти гумрук дар самти ҳамкориҳои байналхалқӣ низ ба сатҳи нав баромад. Дар ин самт бо хидмати гумрукии ИМА, Кореяи Ҷанубӣ, Чин, Ҷопон, Озарбойҷон, Арманистон, Туркия, Русия, Белорус, Гурҷистон, Латвия, кишварҳои ҳамсоя ва чанд созмони бонуфузи байналхалқӣ чорабиниҳои дуҷониба ва бисёрҷониба баргузор шуданд. Дар бахши кор бо инвеститсия баҳри татбиқи 474 лоиҳа ба азхудкунии беш аз 8 млрд. доллар инвеститсияи хориҷӣ имконият фароҳам оварда шуд. Бино ба режими «Азнавкоркард дар ҳудуди гумрук» теъдоди соҳибкорони ҷалбгардида ба 350 нафар расид. Тибқи ин режим ҳаҷми азнавкоркарди амволи содиротӣ беш аз 42 фоизро ташкил кард, ки 1 млрд. сӯм арзиш дошт. Ҳоло истифода аз энергияи муқобил – панелҳои офтобӣ оммавӣ мегардад, ки насби онҳоро бояд мақомоти гумрук таҳти назорат гирад. Дар тӯли соли гузашта насби 965 панели офтобии МВт ба 98124 объект таҳти назорати мақомот қарор дошт. Дар ин ҷараён худи мақомот низ фаъол аст. То ҳол ба 71 объекти гумрук 3,8 панели офтобии МВт насб гардид, ки дар натиҷа беш аз 5 млрд. сӯмина маблағи буҷет дар бахши истифода аз неруи барқ сарфа карда шуд. Роҳбари давлатамон хидматҳои ходимони мақомоти гумрукро сазовор қадр менамояд. Чанде қабл дар чорабинии идонае, ки бахшида ба 33-юмин солгарди Нируҳои Мусаллаҳ ва Рӯзи муҳофизони Ватан дар Кумитаи гумрук баргузор шуд, ходими бахши корҳои муҳими кумитаи гумрук Бахтиёр Эргашов бо медали «Ҷасорат» ва мудири шуъбаи Садорати гумруки вилояти Сурхондарё Абдувоҳид Хӯҷамқулов бо медали «Содиқ хизматлари учун» сарфароз гардонда шуданд. Дар тӯли соли равон такмили беш аз пеши қонунгузории мақомоти гумрук, вусъат додани рақамикунонии сохтори ахбор ва содасозии низоми назорати соҳа дар мадди назар аст. А. Субҳонов, хабарнигори «Овози тоҷик».