Президенти Шавкат Мирзиёев 3 феврал бо ҳисоботи лоиҳаҳои бузурги инфрасохтори нақлиёт шинос шуд.
Бо дарназардошти афзоиши талаботи аҳолӣ ва иқтисодиёт, шабакаи нақлиёти кишвар пайваста рушд мекунад. Мувофиқи қарори роҳбари давлат аз 10 октябри соли 2023 соҳаи роҳсозӣ такмил дода шуд, ки ин имкон дод ҳаҷми сохтмон, таъмир ва истифодаи роҳҳо васеъ карда шаванд.
Ҳуҷҷат пешбинӣ менамояд, ки роҳҳои муосири автомобилгард сохта шаванд. Аз ҷумла, бо дастгирии Бонки ҷаҳонӣ лоиҳаи роҳи алтернативии "Тошканд – Андиҷон" таҳия гардид. Ба истифода додани ин шоҳроҳи баландсуръат бо дарозии 314 километр имкон медиҳад, ки вақти сафар байни ду шаҳр аз 5 то 3 соат кӯтоҳ гардад, маҷмӯи маҳсулоти дохилӣ 2,6 фоиз зиёд шуда, шумораи садамаҳои нақлиётӣ 40 фоиз коҳиш дода шавад.
Ба қарибӣ барои ин лоиҳа озмуни байналмилалӣ эълон шуд, ки ба он бисёре аз ширкатҳои пешрафтаи хориҷӣ таваҷҷуҳ зоҳир карданд.
Дар ҷаласа пешниҳодҳо оид ба лоиҳа баррасӣ шуданд. Ба Вазорати нақлиёт супоришот дода шуданд, ки сохтмони шоҳроҳҳои алтернативӣ ва дигар самтҳои сарбориашон зиёдро ба роҳ монанд, роҳат ва амнияти роҳҳоро баланд бардошта, хидматрасониҳои пулакии гуногунро ташкил намоянд.
Ба Президент инчунин дар бораи лоиҳаи таъсиси бандари хушк дар вилояти Навоӣ бо ҳамкории ширкати аморатии AD Ports Group маълумот пешниҳод шуд.
