Президенти Ҷумҳурии Ӯзбекистон Шавкат Мирзиёев 7 феврал ҳайати намояндагони Ҷопонро таҳти роҳбарии мушовири махсуси Сарвазири ин кишвар Акихиса Нагасима қабул кард.

Дар ҷараёни мулоқот масъалаҳои мубрами таҳкими минбаъдаи муносибатҳои дӯстона ва шарикии стратегии Ӯзбекистон ва Ҷопон, густариши ҳамкории гуногунҷанба ва амалии байни ду кишвар баррасӣ шуданд.

Мушовири махсус Акихиса Нагасима ба роҳбари давлати мо саломи самимӣ ва паёми шахсии Сарвазири Ҷопон Сигэру Исибаро расонд.

Таъкид гардид, ки Ҷопон Ӯзбекистонро ҳамчун шарики стратегии боэътимод ва дарозмуддат дар таъмин ва таҳкими ҳамкории байналмилалии озоду рӯшод, ки ба волоияти қонун асос ёфтааст, арзёбӣ менамояд.

Алоҳида қайд гардид, ки Ҳукумати Ҷопон ба рушди муттасили муносибатҳои дуҷониба дар соҳаҳои гуногун, аз ҷумла ҳамкории иқтисодӣ ва инноватсионӣ, кооператсия дар бахшҳои энергетика, саноат, инфрасохтор ва иҷтимоӣ, табодули сермаҳсули фарҳангӣ ва маориф, барномаҳо дар соҳаҳои  сайёҳӣ ва муҳоҷирати меҳнатӣ, инчунин ҳамкории пурсамари минтақавӣ баҳои баланд медиҳад.

Дар соли 2024 мубодилаи моли байни ду кишвар 35 фоиз афзоиш ёфт. Маҷмуи лоиҳаҳо бо ширкат ва бонкҳои пешсафи Ҷопон зиёда аз 12 миллиард долларро ташкил медиҳад. Дар Ӯзбекистон тақрибан 100 корхона ва ташкилоти муштарак, аз ҷумла Маркази Ӯзбекистон – Ҷопон бомуваффақият фаъолият мебаранд.

Роҳбари Ӯзбекистон муҳим будани идомаи муколамаи фаъол ва давом додани ташрифҳои мутақобиларо дар сатҳи олӣ ва баланд таъкид намуд. Бо қаноатмандӣ зикр гардид, ки рӯзномаи ҳамкорӣ дар соҳаҳои савдо-иқтисодӣ, сармоягузорӣ ва молиявию техникӣ, аз ҷумла дар доираи Барномаи ҳукуматии Ҷопон оид ба мусоидат ба рушд пурмазмун мебошад.

Президенти Ӯзбекистон инчунин ба Ҳукумати Ҷопон бомуваффақият  баргузор намудани Намоишгоҳи ҷаҳонии «Экспо»-ро, ки моҳи апрели соли ҷорӣ дар шаҳри Осака оғоз мегардад, таманно намуд.

Оид ба масъалаҳои ҳамкории минтақавӣ дар ҷанбаи омодагӣ ба аввалин ҳамоиш дар формати «Осиёи Марказӣ ва Ҷопон» мубодилаи афкор ба амал омад.

ӮзА.