Ҳангоми расидан ба синни нафақа, шаҳрвандон дигар ниёз ба пешниҳоди ариза нахоҳанд дошт — гузариш ба низоми проактивии таъини нафақа сурат мегирад. Депутатҳо қонуни дахлдорро дар қироати аввал қабул карданд.
Палатаи қонунгузории Олий Маҷлиси Ҷумҳурии Ӯзбекистон дар ҷаласаи рӯзи 13 феврал қонун «Дар бораи гузариш ба низоми проактивии таъини нафақа»-ро дар қироати аввал қабул кард. Дар ин бора хадамоти матбуотии палатаи поёнии парлумон хабар додааст.
Тибқи лоиҳаи мазкур, ба қонуни «Дар бораи таъмини нафақаи давлатӣ барои шаҳрвандон» тағйиру иловаҳо ворид карда мешаванд, ки мувофиқи он ба шаҳрвандоне, ки ба синни нафақа мерасанд (мардон — 60-сола, занон — 55-сола), нафақаи синнусолӣ бе пешниҳоди аризаи алоҳида таъин карда мешавад.
Дар айни замон, шаҳрвандон барои гирифтани нафақа бояд ариза дода, ҳуҷҷатҳое пешниҳод кунанд, ки ҳуқуқи онҳоро ба пардохтҳои нафақавӣ тасдиқ мекунад. Акнун ин раванд дар доираи табодули иттилоот миёни вазорату идораҳои дахлдор автоматӣ мегардад.
Муовини вазири иқтисод ва молия Гулнора Раҳимова зикр кард, ки бо шарофати ин тағйирот, ҳар сол ба ҳисоби миёна 250 ҳазор шаҳрванд ниёз ба муроҷиат ба Фонди нафақа ва марказҳои хизматрасонии давлатӣ нахоҳад дошт, ки ин вақт ва маблағро сарфа менамояд.
«Қабули лоиҳаи қонун ба татбиқи фаъолонаи технологияҳои рақамии муосир дар низоми таъини нафақа мусоидат намуда, сифати хизматрасониҳои давлатии расонидашударо боз ҳам беҳтар хоҳад кард», — омадааст дар хабар.
Ёдовар мешавем, ки тибқи қарори Президент, ки 31 октябри соли 2023 қабул шудааст, ба нақша гирифта шудааст, ки низоми проактивии таъини нафақа аз 1 марти соли 2025 ба кор оғоз кунад.
Инчунин, то 1 март ба шаҳрвандон дар бораи таъини нафақа ё зарурати пешниҳоди ҳуҷҷатҳои иловагӣ, ки ба ҳаҷми нафақа таъсир мерасонанд, тавассути телефони мобилии онҳо паёми SMS фиристода мешавад.
