Президенти Ҷумҳурии Ӯзбекистон Шавкат Мирзиёев 18 феврал, баъди бозгашт аз Кувайт ба Тошканд раиси Шӯрои оқсақолони Созмони давлатҳои туркӣ, сиёсатмадори маъруф, собиқ Сарвазири Ҷумҳурии Туркия Бинали Йилдиримро, ки барои ширкат дар чорабиниҳои байналмилалии соҳаи шаҳрсозӣ ба мамлакати мо омадааст, қабул кард.
Дар оғози вохӯрӣ меҳмони олимартаба ба сарвари давлатамон салом ва таманниёти накӯтарини Президенти Туркия Реҷеп Таййип Эрдоғанро расонд.
Бо назардошти афзудани нақш ва иштироки фаъолонаи Шӯрои оқсақолон дар ҳамоҳангсозӣ ва пешбурди ҳамкориҳои бисёрҷониба, масъалаҳои густариши минбаъдаи ҳамкориҳои чандтарафа дар доираи созмон баррасӣ гардид.
Таъкид гардид, ки ҷиҳати татбиқи барнома ва ташаббусоти дар анҷоми ҳамоишҳои Созмони давлатҳои туркӣ қабулшуда, тавсеаи шарикии амалӣ ва фаъолсозии робитаҳо аҳамияти калон доранд.
Масъалаҳои омодагӣ ва баргузории чорабиниҳои минбаъда дар доираи СДТ баррасӣ шуданд.
Бояд гуфт, ки Шӯрои оқсақолон мақомоти доимии машваратӣ дар назди Созмони давлатҳои туркӣ маҳсуб меёбад.
Конгресси шаҳрсозии ҷаҳони турк аз ҷониби Иттиҳоди муҳандис ва меъморон, ки соли 2002 дар Анқара таъсис ёфтааст, гузаронида мешавад. Дар фаъолияти иттиҳод ҳокимиятҳои шаҳрҳои Самарқанд ва Навоӣ фаъолона иштирок мекунанд.
