Президенти Ҷумҳурии Ӯзбекистон Шавкат Мирзиёев 24 феврали соли ҷорӣ вазири корҳои хориҷии Султонати Уммон Бадр бин Ҳамад Ал-Бусаидиро ба ҳузур пазируфт.
Дар оғози мулоқот вазир ба сарвари давлати мо паёми самимӣ ва номаи шахсии Султони Уммон Ҳайсам бин Тариқ Ал Саидро расонид.
Масъалаҳои тавсеаи минбаъдаи ҳамкории судманди дуҷониба, бахусус истифодаи пурраи имкониятҳои шарикӣ дар соҳаҳои тиҷоратию иқтисодӣ ва сармоягузорию молиявӣ баррасӣ шуданд.
Бо қаноатмандӣ зикр гардид, ки робитаҳои байниидоравӣ ва тиҷоратӣ фаъолтар шуда истодаанд. Ҳаҷми гардиши мол афзоиш меёбад, шумораи корхонаҳои муштарак меафзояд ва чорабиниҳои тиҷоратӣ бо иштироки ширкатҳои пешбари ҳарду кишвар мунтазам баргузор мешаванд.
Ба афзоиши ҳаҷми сармояи Ширкати муштараки сармоягузорӣ тавассути лоиҳаҳои нави ҳамкорӣ таваҷҷуҳи махсус дода шуд.
Моҳи апрели соли ҷорӣ ҷаласаи навбатии Комиссияи байниҳукуматӣ ва форуми муштараки соҳибкорӣ баргузор мегардад.
Илова бар ин, муҳимияти рушди робитаҳои байнипарлумонӣ, мубодилаи фарҳангӣ ва гуманитарӣ, инчунин роҳандозии парвозҳои мустақим таъкид гардид.
Ҳамчунин, оид ба масъалаҳои рӯзмарраи минтақавӣ, аз ҷумла омодагӣ ба ҳамоиши дуюми "Осиёи Марказӣ – кишварҳои Халиҷ", ки моҳи майи соли ҷорӣ дар шаҳри Самарқанд баргузор мегардад, табодули афкор сурат гирифт.
