Модаркалон ё Момо ин танҳо вожае нест, балки як олами беҳудуди меҳру муҳаббат, панду ҳикмат, сидқу садоқате ҳам ҳаст, ки мо аз хурдӣ, аз бачагии худ ба он дилбаставу «гирифторем».

Дар ҳар хонае, ки модаркалон дорад, гӯё савту мусиқии махсусу муниси ғамхориву дилсӯзӣ, андарзу насиҳат садо медиҳад, фазояш аз хотираву ёддоштҳо лабрез аст. Ба андешаи ман санаи 8 Март — рӯзест, ки мо дар он нақши нодиру ноёберо, ки момоямон дар зиндагии ҳар кадоми мо дошту дорад, бо як эҳсоси гарму ширин ба ёд меоварем. Ман ёд надорам, ки дар хурдиву бачагӣ чанд маротиба ба хонаи модаркалон омадаам, вале истиқболу гармии ӯ, оғӯши пурмеҳру чеҳраи кушоду табассуми беғаши вай, кулчаҳои ширину шириву қандиашро, ки ба фикрам, ширинтарину гуворотарин хӯрданиҳои ҷаҳон буданд, ҳаргиз, балки ҳеҷ гоҳ фаромӯш намекунам. Вай дар ҳангоми душвориҳо чӣ гуна мададгору ғамхор ва дар фурсати хурсандиву нишот чӣ сон ҳамдаму ҳамроҳ буданро ҳамеша ва хеле хуб медонад. Бахусус дурандешии табиӣ, балки худододии модаркалон дар дили ман мавқеи хоса дорад. Агар гӯям, ки сабақҳои ҳаётии ӯ бобати чӣ тавр паси сар намудани душвориҳо, дарк ва қадр кардани лаҳзаҳои одии шодиву шодмонӣ, дӯст доштани атрофиёни худ, бидуни шубҳа, асоси феълу атвори ман гардидаанд, дурӯғ намегӯям, муҳобот намекунам. Зеро ӯ зуд-зуд ҳикоятҳоеро аз зиндагии худ ё гузаштагонаш бо мисолу намунаҳое нақл мекунад, ки на фақат завқбахшу рағбатноканд, балки ибратомӯз ҳам ҳастанд, ҳақиқати ҳаёт, воқеъияти рӯзгорро инъикос мекунанд. Ман як ҳикмати дар назари аввал хеле оддиро аз ӯ борҳо шунидаам, ки ин аст: «Аввал бубин ҷойи худ, баъд бимон пойи худ». Бубинед, чӣ қадар содаву одӣ ва ҳамчунин чӣ андоза ҳикматдору пурарзишанд ин гуфтаҳо. 8 Март фақат ҷашни баҳор, модарону хоҳарон нест, балки рӯзу фурсати бисёр хуби изҳори шукру сипос ба модаркалон, ба он лаҳзаҳое ҳам ҳаст, ки ӯ дар ҳаёти мо — наберагонаш доштааст. Бигузор, лабони ӯро табассуми малеҳу зебо, чеҳраашро шукуфтагии ҳамешагӣ тарк накунанд. Дилаш аз хурсандӣ пурнур бошад. Ҷашнат муборак бод, модаркалони азиз! Ораш Акабоев, донишҷӯйи соли сеюми Донишгоҳи давлатии забонҳои ҷаҳони Ӯзбекистон.