Президенти Ҷумҳурии Ӯзбекистон Шавкат Мирзиёев ҳайати намояндагонро таҳти сарварии вазири энергетика ва инфрасохтори Аморати Муттаҳидаи Араб Суҳайл ал-Мазруӣ қабул кард.
Дар оғози мулоқот вазир ба роҳбари давлати мо салом ва орзуҳои беҳтарини Президенти АМА Шайх Муҳаммад Ол Наҳаён, Сарвазир, амири Дубай Шайх Муҳаммад Ол Мактум ва ноиби президент Шайх Мансур Ол Наҳаёнро расонд.
Масъалаҳои тавсеаи минбаъдаи ҳамкориҳои амалӣ дар самтҳои устувор дар асоси “харитаи роҳ”-и қабулшуда баррасӣ гардиданд.
Бо камоли қаноатмандӣ таъкид гардид, ки ҳангоми сафари Президенти Ӯзбекистон ба Аморати Муттаҳидаи Араб дар моҳи январи соли равон натиҷаҳои таърихӣ ба даст омада, муносибатҳои гуногунҷанбаи ду мамлакат ба сатҳи шарикии стратегӣ бардошта шуданд.
Ҳаҷми савдои байниҳамдигарӣ, корхонаҳои муштарак ва теъдоди парвозҳои мустақим пайваста меафзояд. Бастаи лоиҳаҳо бо иштироки ширкатҳои пешқадами аморат қариб 20 миллиард долларро ташкил медиҳад.
Ба пешбурди лоиҳаҳои ҳамкорӣ дар соҳаҳои энергетика, электротехника, кишоварзӣ, хоҷагии об, модернизатсияи инфрасохтори коммуналӣ ва нақлиётӣ дар минтақаҳои Ӯзбекистон диққати махсус дода шуд.
Масъалаҳои омодагӣ ба чорабиниҳои ояндаи сатҳи олӣ низ баррасӣ гардиданд.
