Дар шаҳри Тошканд шахсоне боздошт гардиданд, ки ба қаллобӣ ҳангоми кӯшиши гирифтани қарзи бузурги бонкӣ гумонбар дониста мешаванд.
Бино ба иттилои Хадамоти амнияти давлатӣ, роҳбари як корхонаи хусусӣ — зани пештар судшудаи соли таваллудаш 1979 — ба боварии як сокини ноҳияи Қибрайи вилояти Тошкент даромада, ба ӯ ваъда додааст, ки барои гирифтани қарзи мақсаднок ба маблағи 3 миллион доллари ИМА аз яке аз бонкҳои саҳҳомии тиҷоратӣ кӯмак мекунад. Барои «хизмат»-и худ ӯ 33 фоизи маблағ, яъне 990 ҳазор доллар талаб кардааст.
Дар натиҷаи чорабинии фаврӣ, ки аз ҷониби Раёсати Хадамоти амнияти давлатии вилояти Тошкент ва Департаменти мубориза бо ҷиноятҳои иқтисодӣ гузаронида шуд, ин зан ҳангоми гирифтани 150 ҳазор доллар дастгир шуд.
Ҳамчунин, дар ҷараёни амалиёт гумонбари дигари асосӣ — сокини шаҳри Урганҷ, соли таваллудаш 1983, ки худро ҳамчун корманди бонк муаррифӣ карда, ваъдаи мусоидат дар гирифтани қарзро медод, боздошт гардид.
Аз рӯи ин ҳодиса парвандаи ҷиноятӣ бо моддаҳои 168 (қаллобӣ) ва 28, 211 (порадиҳӣ) Кодекси ҷиноятии Ҷумҳурии Ӯзбекистон оғоз карда шудааст. Нисбати гумонбарон чораи пешгирӣ ба шакли ҳабс татбиқ шуда, тафтишоти пешакӣ идома дорад.
