Президент Шавкат Мирзиёев зимни боздид аз IT-парк бо тақдимоти лоиҳаҳое шинос шуд, ки ба густариши васеи татбиқи технологияҳои зеҳни сунъӣ дар фаъолияти вазорату идораҳо, инчунин дигар соҳаҳои иқтисод ва ҳаёти иҷтимоии кишвар равона шудаанд.

Қайд гардид, ки имрӯз зеҳни сунъӣ ба яке аз омилҳои асосии ҳаракатдиҳандаи рушди иқтисод, маориф, тандурустӣ ва амният табдил ёфтааст. Ин технологияҳо имконият медиҳанд, ки самаранокии идоракунии давлатӣ боло равад, истифодаи оқилонаи захираҳо таъмин гардад ва сифати хизматрасониҳо ба аҳолӣ беҳтар шавад.

Дар солҳои охир дар Ӯзбекистон низ дар ин самт ислоҳоти низомӣ татбиқ шуда, ба туфайли он дар ҷорӣ намудани зеҳни сунъӣ натиҷаҳои назаррас ба даст омадаанд. Сарвари давлат таъкид намуд, ки ин дастовардҳо танҳо қадамҳои аввалини ин соҳа мебошанд ва дар пеш корҳои боз ҳам васеъ ва муҳим қарор доранд.

Дар ин робита Президент зарурати фаъолона пеш бурдани ташаббусҳоро оид ба рушди зеҳни сунъӣ, тезонидани ҷорӣ намудани қарорҳои пешрафта ва пешгирӣ аз қафомонӣ аз тамоюлҳои ҷаҳонӣ таъкид намуд.

Дар ҷараёни муаррифӣ ба масъалаҳои татбиқи қарорҳои зеҳни сунъӣ дар иқтисод ва соҳаи иҷтимоӣ, инчунин паҳн намудани таҷрибаи муваффақ таваҷҷуҳи махсус зоҳир карда шуд. Таъкид гардид, ки барои рушди босуботу устувори ин самт таҳлили пайвастаи таҷрибаи дохилӣ ва байналмилалӣ, ҳамкории зич бо мутахассисони ҷавон, коршиносони байналмилалӣ ва бахши хусусӣ зарур аст.

Яке аз омилҳои муҳимтарини рушди соҳа тайёр намудани мутахассисони баландихтисос ба шумор меравад. Барои суръат бахшидан ба ин раванд, дар кишвар як қатор барномаҳои инноватсионии таълимӣ амалӣ мегарданд.

Аз ҷумла, лоиҳаи кластери зеҳни сунъии "Донишгоҳ – саноат – ҳамкории байналмилалӣ» муаррифӣ гардид. Дар доираи ин ташаббус баланд бардоштани саводнокии зеҳни сунъии хонандагон, такмили ихтисоси омӯзгорон, таҳияи китобҳои махсуси таълимӣ ва омода кардани мутахассисони муосир барои соҳа пешбинӣ шудааст.

Ҳамчунин платформаи таълимии “AI Maktab” муаррифӣ гардид, ки ҳадаф аз он омӯзонидани ҷавонон ба малакаҳои рақамӣ ва ихтисосҳои муосир мебошад. Бо истифода аз ин платформа иштирокчиён метавонанд дар даҳҳо самт таҳсили фосилавӣ — аз таҳияи ёрдамчиёни виртуалӣ ва маркетологи рақамӣ то офарандагони контенти AI ва таҳлилгари бизнес дарёфт намоянд.

Президент аҳамияти тавсеаи чунин барномаҳо ва ҷалби иқтидори инноватсионии ҷавононро ба рушди соҳаҳои калидӣ таъкид намуд.

Ғайр аз ин, ба натиҷаҳои интизоршавандаи таъсиси лабораторияҳои илмӣ-таълимӣ дар соҳаи зеҳни сунъӣ низ диққат дода шуд. Лоиҳаҳои ҷорӣ, ки аз ҷониби бонкҳои тиҷоратӣ амалӣ мешаванд, баррасӣ гардиданд. Таъкид гардид, ки дар ояндаи наздик чунин ташаббусҳои тадқиқотӣ ва амалӣ дар муассисаҳои таҳсилоти олӣ бояд бештар рушд ёбанд.

Сарвари давлат инчунин бо лоиҳаҳои инноватсионии ҷавонони боистеъдод, аз қабили "PromptLab", "Detecting-AI.com" ва "KotibAI" шинос шуд.

Таъкид гардид, ки чунин барномаҳо ва замимаҳо барои баланд бардоштани самаранокии меҳнат, зиёд кардани манбаъҳои даромад ва осон намудани фаъолияти зеҳнӣ ҳам дар гурӯҳҳои хурд ва ҳам дар ширкатҳои калон имкониятҳои васеъ фароҳам меоранд. Дар айни замон, ин коркардҳои ватанӣ аллакай дар муассисаҳои молиявӣ, соҳаи сохтмон ва фаъолияти гурӯҳҳои эҷодӣ истифода мешаванд.

Президент Шавкат Мирзиёев ташаббусҳо ва лоиҳаҳои муаррифишударо тасдиқ намуда, оид ба тезондани равандҳои ҷорӣ намудани зеҳни сунъӣ дастур ва тавсияҳо дод.