Сафари Сарвари давлатамон ба Иёлоти Муттаҳидаи Амрико дар таҳкими ҳамкории минтақавию глобалӣ, сулҳ ва устуворӣ рӯйдоди муҳим ва таърихӣ гардид.

Дар оғоз бо вакилони парламенти ИМА мулоқот баргузор шуд, ки онро метавон намунаи равшани фарҳанги нави муколамаи сиёсӣ миёни кишварҳои демократӣ номид. Аҳамияти ин мулоқот дар он аст, ки на танҳо ба равобити байни парлумонҳои ду давлат тақвият мебахшад, балки аз ба марҳилаи нав баромадани ҳамкории ниҳодҳое, ки иродаи халқҳоро ифода мекунанд, шаҳодат медиҳад.

Президенти кишвар ҳангоми таваҷҷуҳ ба масъалаҳои робитаҳои байнипарлумонӣ, хусусан ба фаъолияти Кокуси Осиёи Марказӣ дар Сенат ва Палатаи намояндагони ИМА баҳои баланд дод. Масоили таҳкими шарикии стратегӣ байни Узбекистон ва ИМА ва густариши ҳамкории амалӣ миёни парлумонҳои ду кишвар мавриди баррасӣ қарор гирифт.

Форуми тиҷоративу сармоягузорӣ, мулоқотҳои вобаста ба ҳамкории сармоявӣ ва музокирот бо намояндагони ширкат  ва бонкҳои бузурги Амрико, ки дар доираи ин сафари расмӣ баргузор шуданд, нуфузи иқтисодии Ӯзбекистонро ба сатҳи нав бароварданд. Пешниҳоди доираҳои тиҷоратии ИМА дар соҳаҳои энергетика, технологияҳои баланд, кишоварзӣ, нақлиёт ва маориф аз афзоиши таваҷҷуҳ ба кишвари мо дарак медиҳанд. Ин раванд ба пайдоиши ҷойҳои нави корӣ, болоравии сатҳи зиндагии мардум ва фаъол шудани бахши хусусӣ мусоидат мекунад. Ба назари мо, чунин ҳамкорӣ на танҳо натиҷаи иқтисодӣ, балки омили муҳими таҳкими суботи иҷтимоӣ ва таъмин кардани тақсимоти одилона низ ҳаст.

Зеро меъёри асосии рушди иқтисодӣ мусоидат ба манфиатҳои инсон аст. Дар тарҳҳое, ки бо ташаббуси Президенти мо амалӣ мешаванд, таваҷҷуҳ ба рушди сармояи инсонӣ, маориф ва инноватсия афзудааст, ки  бо ҳадафҳои мо комилан ҳамоҳанг мебошад.

Ҳодисаи муҳимтарин ва дар маркази таваҷҷуҳи ҷомеаи ҷаҳонӣ — мулоқоти раҳбари давлатамон бо Президент Доналд Трамп буд. Ин на танҳо гуфтугӯи ду раҳбари давлатӣ, балки раванди стратегиест, ки тамоюлҳои нави ҳамкориро барои минтақаи Осиёи Марказӣ муайян мекунад.

Дар мулоқот масоили амнияти минтақавӣ, ширкати иқтисодӣ ва ҳамкорӣ дар бахши технологияҳои нав мавриди баррасӣ қарор гирифтанд. Доналд Трамп аз ислоҳоти нав, сиёсати мардумгароёна, муҳити бозу шаффофи иқтисодӣ, кафолатҳои сармоягузорӣ ва қадамҳои Ӯзбекистон дар соҳаи ҳифзи ҳуқуқи инсон хуш истиқбол кард. Ин ҳама бори дигар дипломатияи мустақил, прагматикӣ ва манфиатбори кишвари моро нишон дод.

Иштироки Сарвари давлат дар саммити «C5+1», ки мизбони он Иёлоти Муттаҳида буд, аз ҳар ҷиҳат барои кишвари мо судманд гардид. Қайд бояд кард, ки то кунун сарварони кишварҳои Осиёи Марказӣ ҳеҷ гоҳ ҳамзамон дар «Кохи сафед» ҷамъ омада, бо ИМА музокирот анҷом надода буданд.

Мавзуъҳои дар саммит муҳокимашуда — экология, идораи захираҳои об, логистикаи нақлиёт, иқтисодиёти «сабз» ва ҳамкорӣ дар бахши маориф — қадамҳои муҳим дар роҳи ҳифзи манфиатҳои наслҳои оянда мебошанд.

Ташаббусҳое, ки аз ҷониби  Президентамон пешбинӣ шуданд, бо аҳамияти худ муҳити устувор ва эътимоди мутақобиларо дар минтақа тақвият мебахшанд. Зеро асоси рушди устувор сулҳ, адолат ва сиёсати инсонпарварона мебошад.

Бешубҳа, чунин сафар ва муколамаҳои сиёсӣ ҷойгоҳи кишвари моро дар ҷомеаи ҷаҳонӣ боз ҳам мустаҳкам месозанд. Зеро сиёсати одилона, кушод  ва инсонпарварона кафолати боэътимоди тараққиёти оянда мебошад.

Робахон Маҳмудова,

роҳбари фраксияи Ҳизби демократии «Адолат» дар Палатаи қонунгузории Олий Маҷлис.