Бар асоси натиҷаҳои музокироти самарабахш, ки дар қароргоҳи «Кӯксарой» баргузор гардид, Президенти Ҷумҳурии Ӯзбекистон Шавкат Мирзиёев ва Президенти Ҷумҳурии Қазоқистон Қосим-Жомарт Токаев барои намояндагони воситаҳои ахбори омма изҳорот доданд.

Сарвари давлат бо қаноатмандии амиқ таъкид кард, ки сафари давлатии Президенти Қазоқистон ба Ӯзбекистон рӯйдоди таърихӣ гардид ва марҳалаи муҳимеро дар рушди муносибатҳои шарикии стратегӣ ва ҳампаймонии ду кишвар ба вуҷуд овард.

Дар ҷараёни сафари расмӣ ҷаласаи дуюми Шӯрои Олии байнидавлатӣ баргузор шуд, ки дар он ҷанбаҳои асосии рӯзномаи дуҷониба баррасӣ гардиданд.

Ба масъалаҳои ҳамкориҳои иқтисодӣ диққати махсус дода шуд. Таъкид гардид, ки Қазоқистон яке аз шарикони асосии тиҷоратии Ӯзбекистон ба ҳисоб меравад.

Аз аввали сол гардиши мол 15 фоиз афзуда, қариб ба 4 миллиард доллар расид. Бо ҳадафи расонидани ин нишондод ба 10 миллиард доллар то соли 2030 корҳои мухталифи комплексӣ идома доранд. Яке аз рӯйдодҳои муҳими сафари расмӣ ифтитоҳи Маркази байналмилалии ҳамкории саноатии «Осиёи Марказӣ» гардид.

Ин лоиҳаи намунавӣ барои таҳкими робитаҳои кооператсионӣ байни ду кишвар ва ташаккули занҷираҳои муосири арзиши иловашуда равона шудааст.

Ҳамчунин, ба лоиҳаҳои нав дар соҳаҳои афзалиятнок бо арзиши умумии 1,3 миллиард доллар оғоз бахшида шуд.

Ғайр аз ин, самтҳои асосии рушди робитаҳои нақлиётӣ муфассал баррасӣ шуданд. Тарафҳо мувофиқа карданд, ки роҳравҳои муосири нақлиётиро якҷо рушд диҳанд, самаранокии инфрасохтори марзиро баланд бардоранд ва ҳамлу нақли борро, аз ҷумла тавассути бандарҳои Ақтау ва Қуриқ, фаъол гардонанд.

Ҳамкории ду кишвар дар соҳаи энергетика ҳамчун самти стратегӣ муайян карда шуд, ки он татбиқи лоиҳаҳои муштараки энергетикаи анъанавӣ ва алтернативиро дар бар мегирад.

Тарафҳо ҳамчунин ҳамкориҳоро дар соҳаи ҳифзи муҳити зист ва истифодаи оқилонаи захираҳои об, махсусан дар минтақаи Осиёи Марказӣ, тақвият медиҳанд.

Ба масъалаҳои рушди робитаҳои фарҳангӣ-гуманитарӣ низ аҳамияти калон дода шуд. Имсол дар Алмаато ва Остона намоиши балети «Лазги», намоиши рассомон, форуми адабиётшиносон ва фестивали ҷавонон бо муваффақият баргузор гардид. Рӯзҳои тибби Қазоқистон дар Ӯзбекистон таваҷҷуҳи васеъ ва истиқболи гарми мардумро ба даст оварданд.

Тарафҳо мувофиқа карданд, ки мубодиларо миёни муассисаҳои илмӣ ва таълимӣ, созмонҳои эҷодиву ҷавонон фаъол гардонанд ва барномаҳои муштаракро дар соҳаи сайёҳӣ тавсеа диҳанд.

Таъкид шуд, ки ҳар ду ҷониб ба таҳкими ҳамкориҳои минтақавӣ содиқ ҳастанд. Дар ин замина нақши муҳимми формати Мулоқоти машваратии сарони давлатҳои Осиёи Марказӣ махсус қайд гардид.

Таъкид шуд, ки Мулоқоти машваратии навбатӣ, ки фардо дар Тошканд баргузор мегардад ва ҳафтуми он ба ҳисоб меравад, ба раванди ҳамгироии минтақавӣ ва таҳкими ҳамбастагии тамоми Осиёи Марказӣ такони ҷиддӣ хоҳад бахшид.

Қайд гардид, ки идомаи дастгирии мутақобила дар минбарҳои бисёрҷониба, аз ҷумла СММ, Созмони ҳамкории Шанхай, ИДМ, Созмони давлатҳои турк ва форматҳои «Осиёи Марказӣ плюс» аҳамияти ҷиддӣ дорад.

– Сафари расмии Қосим-Жомарт Кемелевичи муҳтарам бори дигар сатҳи баланди муносибатҳои иттифоқиро миёни кишварҳои мо равшан нишон дод, – таъкид кард Сарвари давлат.

Дар анҷом, Президенти Шавкат Мирзиёев итминон изҳор намуд, ки созишномаҳои бадастомада ва ҳуҷҷатҳои имзошуда шарикии дуҷонибаро бо мазмуни амалӣ ғанӣ сохта, барои лоиҳаҳои муштарак уфуқҳои нав мекушоянд ва заминаи боэътимоди рушди устувори ду давлати бародарро фароҳам меоранд.