Мувофиқи Фармони Президент аз 9 декабри соли 2021 «Дар бораи чорабиниҳо оид ба сохтмони мавзеъҳои «Ӯзбекистони Нав» ва таъмини рушди иҷтимоиву иқтисодии минтақаҳо», дар вилояти Сурхондарё мавзеъҳои «Ӯзбекистони Нав» бунёд шуда, ҳазорон оила соҳиби хонаҳои замонавӣ мегарданд.
Ҳар як ҳамватане, ки калиди хонаҳои нави худро ба даст мегирад, аз чунин ислоҳоте, ки бо мақсади эҳтиром ба арзиши инсон амалӣ мегарданд, изҳори сипос мекунад. Бо ин васила, принсипи некбинонаи «Барои шаъну шарафи инсон» на танҳо дар ҳаёти ҳар як оила, балки дар тарзи зиндагии ҳамватанони мо, ки дар минтақаҳои дурдаст зиндагӣ доранд, низ таҷассум меёбад.
Дар вилоят мавзеъҳои «Ӯзбекистони Нав» дар ноҳияҳои Тирмиз, Ҷарқӯрғон, Сариосиё, Бойсун ва Ангор бунёд мешаванд. Афзалияти асосии хонаҳои бисёрошёнаи ин минтақаҳо дар он аст, ки онҳо бо системаи мутамаркази оби нӯшокӣ ва оби партов, таъминоти барқ ва гармидиҳӣ таъмин мешаванд.
Дар маҳаллаи Янгиободи ноҳияи Тирмиз дар доираи мавзеи «Ӯзбекистони Нав» иншооти соҳаи иҷтимоӣ, аз ҷумла муассисаҳои томактабӣ, муассисаҳои тиббӣ, ду муассисаи таҳсилоти олӣ бо 1500 ҷой, «Боғи Ӯзбекистони Нав» ва маркази фароғатии «Амфитеатр» бунёд мегарданд. Пас аз кӯч бастани аҳолӣ ба ин маҳалла, хатсайрҳои нави нақлиётӣ барои пайваст кардани он бо маркази шаҳр ба роҳ монда мешаванд. Агар ба қуллаи хонаҳои 12 ва 16-ошёнаи бунёдёбанда бароем, тамоми манзараи ноҳия аз боло мисли кафти даст намоён мешавад.
Дар ноҳияи Тирмиз дар доираи мавзеи «Ӯзбекистони Нав» 2000 хонадон сохта шуда, ҳамин теъдод оила бо манзил таъмин гардид.
Дар айни ҳол, корҳои ороишии дохиливу берунии иншоот идома доранд. Дар ояндаи наздик садҳо хонадонҳои дигар низ ба ҷавонон ва оилаҳои нав дода хоҳанд шуд. Хонаҳои 5 ва 9-ошёнаи бунёдшаванда аз 2 ё 3 ҳуҷра иборатанд. Ҳар як хона бо системаи мустақили гармидиҳӣ ва обгармкунӣ таъмин гардида, ин имконият медиҳад, ки ҳарорати хона идора шавад ва истеъмоли энергия то ду маротиба коҳиш ёбад.
Дар маънои воқеӣ, қарор ва фармонҳои давлатӣ на танҳо дар рӯи коғаз, балки дар зиндагии мардум ва тарзи зиндагии онҳо татбиқ мешаванд.
Имрӯз корҳои ободонӣ, ки дар вилояти Сурхондарё амалӣ мегарданд, на танҳо симои меъмориро дигар мекунанд, балки дар дили инсонҳо низ нафаси тоза, рӯҳи нав ва орзуву умедҳои навро бедор месозанд. Зеро зиндагии шоиста аз розигии халқ оғоз меёбад.
Суратгир: Ҷонибек Қӯзимуродов (ӮзА).
