Тафаккури эҷодии инсонӣ аз доираи алгоритмҳо хеле васеътар аст ва зеҳни сунъӣ ҳеҷ гоҳ онро иваз намекунад.

Адам Франк, профессори физика ва астрономия дар Донишгоҳи Рочестер, таъкид кард, ки зеҳни сунъӣ ҳеҷ гоҳ наметавонад эҷодиёти инсонро пурра такрор кунад. Ба гуфтаи олим, зеҳни сунъӣ танҳо як васила дар дасти инсон боқӣ мемонад.Бино ба гузориши korrespondent.net, ин астрофизик дар ин бора дар мақолаи худ барои маҷаллаи Forbes навиштааст.
Франк изҳор дошт, ки аз имкониятҳои зеҳни сунъии муосир дар ҳайрат аст, аммо мутмаин мебошад, ки ҳеҷ як система наметавонад хусусияти беназири тафаккури инсониро такрор кунад.
Ҳамчун мисоли эҷодиёти инсон, астрофизик гурӯҳи мусиқии ҷопонии Atarashii Gakko-ро мисол овард. Ин гурӯҳ дар кори худ панк-рок, хип-хоп, ҷаз ва хореографияи муосирро муттаҳид мекунад. Ба гуфтаи Франк, он чизе, ки чунин лоиҳаҳоро беназир мегардонад, ғайримуқаррарии ғояҳо ва равиши эҷодии онҳост.
Олим таъкид кард, ки зеҳни сунъӣ метавонад дархости корбарро иҷро кунад ва муҳтавои (контенти) шабеҳ бисозад, аммо худи ғоя ба ҳар ҳол дар зеҳни инсон падид меояд.
Ҳамзамон, Франк эътироф кард, ки зеҳни сунъӣ имкониятҳои навро барои башарият мекушояд ва метавонад дар бисёр соҳаҳо ба як ёвари пуриқтидор табдил ёбад. Бо вуҷуди ин, ӯ нигарон аст, ки ин технология таҳти баҳонаи афзоиши ҳосилнокӣ бештар ҷорӣ карда мешавад.