Агар дар поёни соли таҳсили гузашта 321 нафар хатмкунанда бо натиҷаҳои баланд пеш аз муҳлат ба муассисаҳои таҳсилоти олӣ дар асоси грант қабул шуда бошанд, пас дар соли ҷорӣ ин нишондиҳанда ба 484 нафар расидааст. Ба ибораи дигар, дар давоми як сол шумораи донишҷӯёни оянда, ки бидуни интизори имтиҳонҳои асосӣ ба муассисаҳои олӣ роҳ ёфтаанд, 163 нафар зиёд гардидааст.
Солҳои охир соҳаи маориф дар Ӯзбекистон ба яке аз самтҳои афзалиятноки сиёсати давлатӣ табдил ёфтааст. Ислоҳоти густурда, ҷорӣ намудани стандартҳои байналмилалии таълим, такмили инфрасохтори муассисаҳои таълимӣ ва баланд бардоштани сатҳи касбии омӯзгорон тадриҷан натиҷаҳои назаррас ба бор меоранд. Нишондиҳандаҳои ҷамъбастии таҳсили соли ҷорӣ дар вилояти Навоӣ далели равшани онанд, ки таҳаввулоти сифатӣ дар соҳаи маориф на танҳо дар ҳисобот, балки дар дастовардҳои воқеии хонандагон низ таҷассум меёбанд.
Ҳангоми арзёбии вазъи соҳа аксаран таваҷҷуҳ ба омор равона мешавад. Аммо коршиносон таъкид мекунанд, ки муҳим на танҳо афзоиши нишондиҳандаҳо, балки мазмун ва сифати онҳо мебошад. Дар ҳамин замина натиҷаҳои муассисаҳои таҳсилоти умумии вилоят аҳамияти хос доранд.
Агар дар поёни соли таҳсили гузашта 321 нафар хатмкунанда бо натиҷаҳои баланд пеш аз муҳлат ба муассисаҳои таҳсилоти олӣ дар асоси грант қабул шуда бошанд, пас дар соли ҷорӣ ин нишондиҳанда ба 484 нафар расидааст. Ба ибораи дигар, дар давоми як сол шумораи донишҷӯёни оянда, ки бидуни интизори имтиҳонҳои асосӣ ба муассисаҳои олӣ роҳ ёфтаанд, 163 нафар зиёд гардидааст.
Ин рақамҳо пеш аз ҳама аз беҳтар гардидани сифати омодагии хонандагон шаҳодат медиҳанд. Зеро қабул шудан ба муассисаҳои олӣ дар асоси дастовардҳои пешакӣ танҳо барои онҳое имконпазир аст, ки донишу маҳорати худро дар озмуну олимпиадаҳо ва низомҳои байналмилалии баҳогузорӣ собит кардаанд.
Яке аз нишондиҳандаҳои муҳими сатҳи рушди маориф имконияти рақобатпазирии хатмкунандагон дар фазои байналмилалӣ мебошад. Дар ҷаҳони муосир донишгоҳҳои пешсафи ҷаҳон на танҳо марказҳои таълим, балки муҳаррикҳои асосии рушди илм, технология ва иқтисод ба ҳисоб мераванд.
Дар соли таҳсили гузашта аз муассисаҳои таълимии вилояти Навоӣ 17 нафар донишомӯз ба донишгоҳҳои шомили панҷсадгонаи беҳтарини ҷаҳон роҳ ёфта буданд. Имсол бошад, ин нишондиҳанда ба 40 нафар расидааст. Яъне шумораи ҷавононе, ки ба муассисаҳои бонуфузи байналмилалӣ қабул шудаанд, беш аз ду баробар афзудааст. Ин нишон медиҳад, ки сатҳи омодагии хонандагони вилоят имрӯз ба меъёрҳои ҷаҳонӣ наздик шуда истодааст. Ҳамзамон, чунин дастовардҳо обрӯйи низоми таълими минтақа ва кишварро дар арсаи байналмилалӣ боло мебардоранд.
Солҳои охир дар низоми таълим ба гирифтани сертификатҳои миллӣ ва байналмилалӣ аҳамияти махсус дода мешавад. Ин ҳуҷҷатҳо танҳо санади тасдиқкунандаи дониш нестанд, балки нишондиҳандаи сатҳи воқеии қобилияту малакаҳои хонандагон маҳсуб меёбанд. Натиҷаҳои соли ҷорӣ дар ин самт низ қобили таваҷҷуҳ мебошанд. Агар соли гузашта хонандагони синфҳои 10-11 дар маҷмӯъ 6349 сертификат ба даст оварда бошанд, пас имсол шумораи онҳо ба 14 ҳазору 500 адад расидааст.
Чунин афзоиш нишон медиҳад, ки ҷавонон бештар ба омӯзиши забонҳои хориҷӣ, технологияҳои иттилоотӣ, фанҳои дақиқ ва дигар самтҳои афзалиятнок рӯ меоранд. Маҳз ҳамин малакаҳо дар бозори меҳнати асри XXI талаботи бештар доранд. Дастовардҳои бадастомада натиҷаи кори якрӯза нестанд. Пушти ҳар як медал, сертификат ва роҳхат ба донишгоҳ заҳмати омӯзгорон, дастгирии волидон ва меҳнати худи хонандагон қарор дорад. Дар вилояти Навоӣ солҳои охир ба баланд бардоштани маҳорати омӯзгорон, ҷорӣ намудани усулҳои муосири таълим ва истифодаи технологияҳои рақамӣ диққати махсус дода мешавад. Барномаҳои омӯзишӣ, курсҳои такмили ихтисос ва ҳамкорӣ бо муассисаҳои пешқадами таълимӣ барои баланд шудани сифати дарсҳо замина фароҳам овардаанд.
Таҷрибаи кишварҳои пешрафта нишон медиҳад, ки муҳимтарин сарвати ҳар давлат на захираҳои табиӣ, балки неруи инсонӣ мебошад. Аз ин рӯ, рушди маориф ҳамчун сармоягузории дарозмуддат ба ояндаи миллат арзёбӣ мешавад. Натиҷаҳои таҳсили соли ҷорӣ дар вилоят нишон медиҳанд, ки ин сармоягузорӣ самараи худро медиҳад. Афзоиши шумораи донишҷӯёни грантӣ, қабули хатмкунандагон ба донишгоҳҳои бонуфузи ҷаҳон ва зиёд шудани сертификатҳои байналмилалӣ аз он шаҳодат медиҳанд, ки дар минтақа насли нави рақобатпазир, соҳибмаърифат ва ҷавобгӯ ба талаботи замон ташаккул меёбад.
Имрӯз дастовардҳои соҳаи маорифи вилояти Навоӣ танҳо маҷмӯи рақамҳо нестанд. Онҳо нишонаи рушди сифатӣ, болоравии сатҳи дониш ва васеъ гардидани имкониятҳои ҷавонон мебошанд.
Ӯзбакбойи Раҳмон,
хабарнигори «Овози тоҷик».
Вилояти Навоӣ.
