Дар доираи Форуми V байналмилалии сармоягузории Тошканд, ҶСК "Ӯзбекгидроэнерго" як қатор созишномаҳои муҳимро ба даст овард, ки ба ҷалби сармоягузорӣ ба бахши гидроэнергетика ва густариши ҳамкориҳои байналмилалӣ нигаронида шудаанд.
Дар рафти форум, ширкат бо намояндагони ширкатҳои 77 Construction USA Corp.-и ИМА, China Huaneng Group, Adani Group-и Ҳиндустон, MUFG Bank-и Ҷопон, AKA Bank-и Олмон, Koncar-и Хорватия ва In Foro Viridi, Гурӯҳи Бонки Ҷаҳонӣ ва Вазорати тиҷорати хориҷии Афғонистон музокироти дуҷониба анҷом дод.
Дар вохӯриҳо масъалаҳои ҷалби сармоягузориҳои калон ба бахши гидроэнергетика, васеъ кардани механизмҳои шарикии давлатӣ ва хусусӣ, тақвияти ҳамкорӣ бо муассисаҳои молиявии байналмилалӣ ва ҷорӣ намудани технологияҳои муосир баррасӣ шуданд.
Тибқи натиҷаҳои музокирот, як қатор созишномаҳои амалӣ ба даст оварда шуданд. Аз ҷумла, 77 Construction USA Corp. барои густариши ҳамкорӣ дар форматҳои EPC+F ва шарикии давлатӣ ва хусусӣ, инчунин иштирок дар лоиҳаи НБО-и Пском ба мувофиқа расиданд.
Бо Гурӯҳи Бонки Ҷаҳонӣ барои густариши ҳамкорӣ дар самтҳои рушди лоиҳаи НБО-и Хоҷикент, истифодаи механизмҳои кафолати MIGA ва ҷалби барномаҳои грантӣ тавофуқ ба даст омад.
Бо China Huaneng Group оид ба татбиқи лоиҳаҳои бузурги сармоягузорӣ дар асоси шарикии давлатӣ ва хусусӣ ёддошти ҳамкорӣ имзо шуд. Бо Adani Group дар бораи таъсиси гурӯҳи кории муштарак ва таҳияи муштараки лоиҳаҳои умедбахш созишнома ба даст омад.
Ҳамчунин, бо MUFG Bank ва AKA Bank механизмҳои маблағгузории дарозмуддат барои лоиҳаҳои бузурги энергетикӣ баррасӣ шуданд. Бо ширкатҳои хорватии Koncar ва In Foro Viridi оид ба татбиқи лоиҳаҳои нерӯгоҳҳои барқи обии хурду миёна ҳамкорӣ барқарор карда шуд.
Ғайр аз ин, бо ҷониби Афғонистон барои рушди ҳамкорӣ дар соҳаҳои таъминот ва тарҳрезии таҷҳизоти гидроэнергетикӣ созишномаҳо ба даст омаданд.
ҶСК "Узбекгидроэнерго" изҳор дошт, ки ин форум заминаи мустаҳкамеро барои васеъ кардани минбаъдаи ҷуғрофияи ҳамкории байналмилалии ширкат, татбиқи лоиҳаҳои стратегии сармоягузорӣ ва рушди шабакаи гидроэнергетикӣ дар асоси роҳҳои ҳалли муосири молиявӣ ва технологӣ фароҳам овард.
