Дар Шаҳраки эҷодии ҷавонони шаҳри Самарқанд озмоишгоҳи муосири зеҳни сунъӣ ба истифода дода шуд. Ин марказ бо дастгирии Вазорати технологияҳои рақамӣ ва маъмурияти вилояти Самарқанд таъсис ёфта, ба рушди технологияҳои зеҳни сунъӣ, таҳкими иқтидори илмӣ ва рушди экосистемаи инноватсионӣ мусоидат мекунад.

Ёдовар мешавем, ки дар Форуми байналмилалии зеҳни сунъӣ моҳи ноябри соли 2025 Президент Шавкат Мирзиёев зарурати ба яке аз муҳаррикҳои асосии иқтисоди кишвар табдил додани зеҳни сунъиро дар доираи барномаи «5 миллион пешвои зеҳни сунъӣ» таъкид карда буд.
Дар озмоишгоҳ таҷҳизоти пешрафта, аз ҷумла кластерҳои пуриқтидори GPU, серверҳо ва системаҳои муосири идоракунӣ, ки бо технологияҳои ширкатҳои пешсафи ҷаҳонӣ, аз ҷумла Nvidia ва Apple таъмин шудаанд, насб гардидааст. Ин инфрасохтор барои таҳияи моделҳои зеҳни сунъӣ, коркарди ҳаҷми бузурги маълумот, омӯзиши мошинӣ ва гузаронидани таҳқиқоти илмӣ имконият фароҳам меорад.
Дар доираи лоиҳа инчунин Лабораторияи зеҳни сунъӣ, Утоқи прототипсозӣ ва Утоқи лексияҳо таъсис дода шудаанд. Дар онҳо донишҷӯён, муҳаққиқони ҷавон ва гурӯҳҳои стартап метавонанд дар самтҳои зеҳни сунъӣ, тарроҳии 3D, интернети ашё (IoT) ва дигар лоиҳаҳои инноватсионӣ фаъолият намоянд.
Дар ташкили фаъолияти озмоишгоҳ мутахассиси зеҳни сунъӣ Винсент Русса аз Донишгоҳи Кэтлини ИМА низ саҳм гузоштааст.
Ба гуфтаи роҳбари лоиҳа Муҳаммадхон Солиев, ин ташаббус аҳамияти стратегӣ дошта, барои омода намудани мутахассисони баландихтисос, пайдоиши касбҳои нав ва баланд бардоштани рақобатпазирии ҷавонон дар бозори байналмилалии меҳнат замина фароҳам меорад.
Барномаҳои омӯзишии зеҳни сунъӣ бо иштироки коршиносони Иёлоти Муттаҳида ва Чин баргузор шуда, на танҳо барои мутахассисони IT, балки барои намояндагони дигар соҳаҳои иқтисодиёт низ пешбинӣ шудаанд.