Ба метрополитени Тошканд се қатораи нави чорвагонии муосир ворид гардид. Ин иқдом дар доираи барномаи рушди нақлиёти ҷамъиятӣ ва беҳтар намудани сифати хизматрасонӣ ба мусофирон амалӣ шудааст.
Қатораҳои нав бо низоми муосири хунуккунӣ барои рӯзҳои гарми тобистон ва низоми гармкунӣ барои фасли зимистон муҷаҳҳаз буда, барои мусофирон шароити бароҳату мусоид фароҳам меоранд.
Бо мавриди истифода қарор гирифтани ин қатораҳо фосилаи байни ҳаракати қатораҳо камтар шуда, сифати хизматрасонӣ беҳтар мегардад. Ҳамзамон, қатораҳои кӯҳна тадриҷан бо қатораҳои нави дорои муҳлати хизмати дароз иваз карда мешаванд.
Афзоиши шумораи қатораҳои муосир инчунин ба зиёд шудани иқтидори интиқоли мусофирон, риояи мунтазами ҷадвали ҳаракат ва қонеъ намудани талаботи рӯзафзуни мусофирон мусоидат мекунад.
Бино ба иттилои расмӣ, то охири соли равон ба метрополитени Тошканд боз 11 қатораи муосири дигар оварда мешавад. Ин тадбир ба рушди минбаъдаи инфрасохтори метро ва фароҳам овардани хизматрасонии боз ҳам босифат ва бароҳат барои сокинон ва меҳмонони пойтахт замина мегузорад.
