Дар фасли тобистон кӯдакон ва пиронсолон бештар аз таъсири ҳарорати баланд осебпазир буда, ба гурӯҳи хавфи баланд дохил мешаванд. Аз ин рӯ, дар рӯзҳои гарм риояи чораҳои эҳтиётӣ ва пешгирии гармозадагӣ аҳамияти калон дорад.

Кумитаи беҳдошти санитарӣ-эпидемиологӣ ва саломатии ҷамъиятии назди Вазорати тандурустии Ҷумҳурии Ӯзбекистон тавсияҳоро оид ба ҳифзи кӯдакон ва пиронсолон дар шароити гармии шадид омода кардааст.

Тавсияҳо барои ҳифзи кӯдакон:

Интизор нашавед, ки кӯдак ташна шавад. Дар ҳавои гарм ба ӯ мунтазам об диҳед.

Барои сайругашт либоси сабук аз матоъҳои табиӣ ва рангҳои равшан интихоб намуда, ҳатман сарпӯш истифода баред.

Аз соати 11:00 то 17:00 будубоши кӯдаконро зери нурҳои мустақими офтоб маҳдуд кунед. Бозиҳо ва сайругаштро беҳтар аст субҳи барвақт ё бегоҳӣ, вақте ки ҳарорати ҳаво пасттар аст, ба нақша гиред.

Тавсияҳо барои пиронсолон:

Дар давоми рӯз мунтазам об нӯшед, ҳатто агар эҳсоси ташнагии шадид надошта бошед.

Ҳавои хонаро салқин нигоҳ доред, дар сурати имкон аз вентилятор ё кондитсионер истифода баред ва утоқҳоро мунтазам шамол диҳед.

Дар рӯзҳои гарм аз корҳои вазнини ҷисмонӣ ва зери офтоби сӯзон муддати дароз қарор гирифтан худдорӣ намоед ва бештар дар ҷойҳои салқин ё соя истироҳат кунед.

Риояи ин қоидаҳои оддӣ ба коҳиш додани хатари гармозадагӣ, беобшавии организм ва бад шудани вазъи саломатӣ мусоидат мекунад. Дар рӯзҳои гарми тобистон худ ва наздиконатонро эҳтиёт кунед.