Дар шаҳри Бухоро намоишгоҳи касбии "Talaba Expo–2026" баргузор гардид, ки ҳадафи асосии он мусоидат ба шуғли ҷавонон, пайвастани мустақими онҳо бо корфармоён ва дастгирии оғози фаъолияти касбиашон буд.
Дар доираи чорабинӣ иштирокчиён бо имкониятҳои гирифтани қарзҳои имтиёзнок аз рӯи барномаи «Қадам ба сӯи оянда» шинос шуданд. Ҳамзамон онҳо дар тренингҳои амалӣ оид ба таъсис ва рушди соҳибкорӣ ширкат варзида, муаррифии лоиҳаҳои ояндадори стартапиро тамошо карданд. Дар доираи мулоқоти кушоди «Роҳбар ва ҷавонон» низ донишҷӯён имконият пайдо намуданд, ки ба саволҳои худ аз мутахассисон посух гирифта, табодули афкор намоянд.
Дар намоишгоҳ қариб 130 корхона ва корфармо иштирок карда, зиёда аз 1 500 ҷойи кори холӣ пешниҳод карда шуд. Дар чорабинӣ беш аз 10 ҳазор донишҷӯ ҳузур дошта, бо корфармоён мустақим мулоқот карданд, барои гузаштани таҷрибаомӯзӣ ва интихоби ҷойи кори муносиб барои фаъолияти минбаъдаи худ имконият пайдо намуданд.
"Talaba Expo–2026" ҳамчун як платформаи муҳими амалӣ барои рушди касбии ҷавонон, баланд бардоштани рақобатпазирии онҳо дар бозори меҳнат, таҳкими ҳамкории байни муассисаҳои таълимӣ ва истеҳсолот, инчунин таъмини шуғли ҷавонон хизмат намуд.
Маводи ҳамкорӣ
