Ба муносибати Ҷашнвораи байналмилалии «Дӯстӣ» дар Маркази матбуоти миллии Ӯзбекистон нишасти матбуотӣ баргузор гардид.
Дар чорабинӣ роҳбарияти Кумитаи муносибатҳои байнимиллӣ ва масъалаҳои ҳамватанони бурунмарзӣ, намояндагони марказҳои миллӣ-фарҳангӣ, ҷамъиятҳои дӯстӣ ва Иттиҳоди шаҳрҳои бародар иштирок карданд. Дар чорабинӣ оиди ташаббусҳое, ки ба таҳкими минбаъдаи фазои сулҳонаи байнимиллӣ ва таҳаммулпазирӣ, рушди муносибатҳои дӯстона байни миллатҳо, дастгирии фаъолияти марказҳои фарҳангии миллӣ ва густариши дипломатияи мардумӣ нигаронида шудаанд, мубодилаи афкор сурат гирифт. Дар конфронс ҳадафҳо ва вазифаҳои асосии ҷашнвора, ки тибқи барномаи он баргузор намудани чорабиниҳои фарҳангӣ-маърифатӣ, илмӣ-амалӣ ва оммавӣ ба нақша гирифта шудааст, инчунин маълумоти муфассал дар бораи мундариҷа ва моҳияти онҳо пешниҳод карда шуд.
Раиси кумита Қ. Сариев зимни суханронӣ иштирокчиёни конфронсро бо 30-июл – Рӯзи дӯстии халқҳо табрик гуфта, таъкид кард, ки фестивали «Дӯстӣ», ки ҳамасола бо ташаббуси Президент ташкил карда мешавад, як платформаи муҳими маънавӣ ва таълимӣ мебошад, ки барои боз ҳам тақвият додани фазои сулҳонаи байнимиллӣ ва таҳаммулпазирӣ, ки дар кишвари мо барқарор шудааст, афзоиши эҳтироми мутақобила, эътимод ва ҳамбастагӣ байни намояндагони миллатҳо ва гурӯҳҳои гуногуни этникӣ, инчунин рушди робита бо ҳамватанони бурунмарзӣ хидмат мекунад.
Қайд шуд, ки омодагиҳои шадид барои чорабиниҳои фестивали «Дӯстӣ» идома доранд ва барномаи консертии «Оҳангҳои дӯстӣ», намоишгоҳи аксҳои «Ӯзбекистон – сарзамини таҳаммулпазирӣ», намоишгоҳ-ярмаркаи ҳунарҳои дастии «Аз оғӯши Ватан», дар бораи баргузории чорабиниҳо ба монанди «Форуми бародарӣ», чорабиниҳои фарҳангӣ ва таълимӣ дар мавзӯи «Дӯстӣ аз кӯдакӣ» дар фароғатгоҳҳои тобистонаи кӯдакон ва конфронси байналмилалии илмӣ-амалӣ дар мавзӯи «Ваҳдати миллӣ – қувваи пешбарандаи рушди Ӯзбекистони Нав» маълумот дода шуд.
Ҳамчунин қайд шуд, ки яке аз чорабиниҳои асосии ҷашнвора «Форуми шаҳрҳои бародар» мебошад, ки бори аввал дар шаҳри қадима ва ҷавони Самарқанд 24-25 июл баргузор мегардад ва дар он аз 30 кишвари ҷаҳон тақрибан 100 меҳмони хориҷӣ, олимон ва намояндагони созмонҳои байналмилалӣ иштирок мекунанд.
Дар конфронс дар бораи нақши фестивал дар таблиғи васеи ғояҳои ҳамоҳангии байнимиллӣ ва таҳаммулпазирӣ, минбаъд тақвияти фазои эҳтироми мутақобила ва ҳамбастагӣ дар ҷомеа мубодилаи афкор сурат гирифт. Ҳамчунин, як гурӯҳ рӯзноманигорон ва блогерҳо, ки барои таблиғ ва тақвияти ҳамбастагии миллӣ дар ҷомеа хидмат мекунанд, қадрдонӣ ва бо туҳфаҳои хотиравӣ мукофотонида шуданд.
– Фестивали «Дӯстӣ» ба таври васеъ намоиш додани мероси ғании фарҳангӣ, расму оин ва анъанаҳои намояндагони миллатҳо ва гурӯҳҳои гуногуни қавмӣ, ки дар кишвари мо зиндагӣ мекунанд, тақвияти ҳамоҳангии байнимиллӣ ва татбиқи принсипи «Ӯзбекистон хонаи умумии мост» платформаи муҳимест, ки ҳамчун татбиқи мунтазам хидмат мекунад. Дар шароити ҷаҳони муосир, ки кишварҳо ва мардумони гуногун ба ҳамдигар ҳарчи бештар ниёз доранд, таҳкими дӯстӣ ва ҳамдигарфаҳмӣ аҳамияти хосса касб мекунад. Ҷашнвора яке аз чорабиниҳои муҳими фарҳангӣ мебошад, ки ба таҳкими сулҳ, ваҳдат ва ҳамкории байни халқҳо мусоидат мекунад, – таъкид намуд зимни суханронӣ раиси Маркази миллӣ-фарҳангии корейсҳо Пак Виктор.
Ҳадафи асосии ин ҷашнвора наздик намудани мардумони миллатҳои гуногун, муаррифии фарҳанг, расму ойин, санъат ва анъанаҳои миллӣ мебошад. Дар доираи он намоишҳои фарҳангӣ, барномаҳои консертӣ, намоишгоҳҳои ҳунарҳои мардумӣ ва мулоқоту ҳамоишҳои дӯстона баргузор мегарданд.
– Нақши ҷавонон дар чунин ҷашнвораҳо хеле муҳим аст. Иштироки фаъолонаи онҳо дар барномаҳои фарҳангӣ ва мубодилаи таҷриба бо ҳамсолони кишварҳои дигар ҷаҳонбиниро васеъ намуда, эҳтиром ба фарҳангҳои гуногун ва арзишҳои инсондӯстонаро тақвият мебахшад. Дӯстӣ миёни ҷавонони имрӯз метавонад асоси ҳамкории устувори давлатҳо дар оянда гардад. Дар маҷмӯъ, Ҷашнвораи «Дӯстӣ» на танҳо як чорабинии фарҳангӣ, балки воситаи муҳими таҳкими сулҳ, ҳамдигарфаҳмӣ ва ҳамзистии осоишта мебошад. Бо густариши чунин ташаббусҳо метавон робитаҳои байни халқҳоро боз ҳам мустаҳкам намуда, дар тарбияи насли дӯстдорони сулҳу ваҳдат саҳми арзанда гузошт, – гуфт ҳангоми суҳбат раиси Маркази миллӣ-фарҳангии тоҷикони ҷумҳурӣ Г. Субҳонова.
Саодат Бекназарова,
хабарнигори «Овози тоҷик».
