Рӯзи 5 август аз платформаи баҳрии партоб, воқеъ дар наздикии соҳилҳои музофоти Шандуни Чин, моҳвораҳои гиперспектралии Samarkand-2028 ва Lampung-1 аз ҷониби ширкати STAR.VISION ба мадор бароварда мешаванд.
Солҳои охир таҳти роҳбарии Президенти Ҷумҳурии Ӯзбекистон ба рушди технологияҳои миллии кайҳонӣ, густариши барномаҳои моҳворавӣ ва таҳкими ҳамкориҳои байналмилалӣ дар соҳаи кайҳон таваҷҷуҳи хосса зоҳир мешавад. Миссияи Samarkand-2028 яке аз натиҷаҳои амалии ин сиёсат буда, марҳилаи муҳиме дар муаррифии иқтидори Ӯзбекистон дар самти технологияҳои кайҳонӣ ва зеҳни сунъӣ дар арсаи байналмилалӣ ба ҳисоб меравад.
Моҳвораи Samarkand-2028 натиҷаи амалии ҳамкориҳои Агентии «Ӯзбеккосмос» ва ширкати STAR.VISION дар доираи ёддошти стратегии ҳамкорӣ мебошад. Тибқи ин ёддошт, ба моҳвораи гиперспектралие, ки аз ҷониби Чин ба кайҳон бароварда мешавад, номи Samarkand-2028 дода шудааст. Ин ном ба ифтихори қарор дар бораи баргузории Конгресси байналмилалии астронавтикаи соли 2028 дар шаҳри Самарқанд интихоб шудааст. Қарори мазкур дар Конгресси байналмилалии астронавтика (IAC), ки дар шаҳри Сиднейи Австралия баргузор шуда буд, қабул гардидааст.
Дар доираи лоиҳа мутахассисони Агентии «Ӯзбеккосмос» барои таҷҳизоти дохилии моҳвора модули махсуси зеҳни сунъӣ таҳия кардаанд. Ин модул имкон медиҳад, ки маълумоти гиперспектралӣ мустақиман дар мадор коркард шавад. Дар натиҷа самаранокии истифодаи технологияҳои зондкунии фосилавии сатҳи Замин ба таври назаррас баланд мегардад.
Пешбинӣ шудааст, ки маълумоти бадастомада дар соҳаҳои кишоварзӣ, ҳифзи муҳити зист, мониторинги захираҳои табиӣ ва дигар самтҳо истифода шавад.
Айни замон моҳвора дар киштии партобкунандаи мушакӣ ҷойгир карда шуда, ба самти минтақаи партоб ҳаракат мекунад. Тамоми корҳои омодагӣ тибқи нақшаи муайяншуда идома доранд.
