Гурӯҳи байналмилалии муҳаққиқон тасвирҳои сатҳи Офтобро бо дақиқии бесобиқа ба даст овард.
Тасвирҳои нав ба олимон имкон медиҳанд, ки сохторҳои ғайриоддии плазмаи тафсонро, ки ҳатто бо пуриқтидортарин телескопҳои офтобӣ қаблан мушоҳида нашуда буданд, таҳқиқ кунанд.
Ин тасвирҳо бо истифода аз Телескопи офтобии Дэниел К. Иноуэ, ки ба Бунёди миллии илмии ИМА тааллуқ дошта, дар ҷазираи Мауии Ҳавайӣ ҷойгир аст, гирифта шудаанд. Мутахассисон таъкид мекунанд, ки мушоҳидаи Офтоб бидуни таҷҳизоти махсуси муҳофизатӣ барои чашм хатарнок аст. Аз ин рӯ, таҳқиқот бо истифода аз таҷҳизоти касбии илмӣ анҷом дода шудааст.
Дар аввал, аксбардорӣ барои санҷидани имкониятҳои телескоп ва танзими таҷҳизоти он анҷом дода шуд. Аммо ҳангоми таҳлили маълумоти бадастомада олимон муайян карданд, ки онҳо дақиқтарин тасвирҳои қабати берунии дурахшони Офтобро дар таърихи мушоҳидаҳои он ба даст овардаанд.
Дар тасвирҳои нав муҳаққиқон сохторҳои ғайриоддиеро мушоҳида карданд, ки ба парҳои паҳншуда дар тамоми сатҳи ситора монанданд. Ба гуфтаи физики офтобшиноси Донишгоҳи Стэнфорд Ҷуйчжу Чэн, ин нақшҳо осмони мавҷдори асари машҳури Винсент ван Гог — «Шаби пурситора»-ро ба ёд меоранд.
Таҳлилҳо нишон доданд, ки ин падидаи мавҷмонанд дар натиҷаи ҳаракати ҷараёнҳои плазмаи магнитнокшуда бо суръатҳои гуногун ба вуҷуд меояд. Ба гуфтаи олимон, ин раванд ба мавҷҳое монанд аст, ки шамол дар сатҳи об ба вуҷуд меорад.
Чунин падидаҳо қаблан дар Замин ва ҳамчунин дар атмосфераи Муштарӣ ва Сатурн мушоҳида шуда буданд. Аммо дар Офтоб ченкунии чунин равандҳо бо ин дараҷаи баланди дақиқӣ бори аввал анҷом дода мешавад, хабар медиҳад Kazinform.
Натиҷаҳои таҳқиқот дар маҷаллаи илмии Nature ба нашр расидаанд.
Ба гуфтаи мутахассисон, омӯзиши муфассали сатҳи Офтоб ба олимон имкон медиҳад, ки беҳтар дарк кунанд, ки партофти массаи тоҷи офтобӣ чӣ гуна ба вуҷуд меояд. Агар чунин ҷараёнҳои плазма ба Замин расанд, онҳо метавонанд боиси тӯфонҳои геомагнитӣ шуда, фаъолияти GPS, алоқаи моҳвораӣ ва дигар системаҳои кайҳониро халалдор кунанд. Ҳамзамон, чунин падидаҳо метавонанд боиси пайдо шудани шапаракҳои қутбӣ — яке аз зеботарин зуҳуроти табиии осмони шабона — шаванд.
