Шиносномаи энергетикӣ пеш аз ҳама ба мутахассисони соҳа имкон медиҳад, ки вазъи энергетикии маҳалларо ба таври ҳамаҷониба баррасӣ намоянд, ҳаҷми истеъмол ва сарбории шабакаҳоро таҳлил кунанд.
Бо мақсади ҷамъоварии маълумот оид ба таъминоти нерӯи барқ ва гази табиӣ дар маҳалла дар як низоми ягона, шиносномаи энергетикии маҳалла таҳия карда мешавад.
Дар он маълумотҳо дар бораи шумора ва таркиби истеъмолкунандагон, ҳаҷми истеъмол, иқтидори мавҷуда, таркиб ва ҳолати техникии инфрасохтор, захираи иқтидор, имконияти пайваст намудани истеъмолкунандагони нав ва зарурати навсозии шабакаҳо инъикос меёбанд.
Шиносномаи энергетикӣ ба мутахассисон имкон медиҳад, ки вазъи умумии маҳалларо арзёбӣ намуда, ҳаҷми истеъмол ва сарбории шабакаҳоро таҳлил кунанд. Ҳамчунин он барои банақшагирии чорабиниҳо ҷиҳати муайян намудани талафоти техникӣ ва тиҷоратӣ, истеъмоли ба ҳисоб гирифта нашуда ва ё пайвастшавиҳои ғайримутобиқ ба талаботи муқарраршуда хизмат мекунад.
Дар он истеъмол ва сарбории корхонаҳои истеҳсолӣ ва объектҳои соҳибкорӣ, инчунин имкониятҳои мавҷудаи энергетикии ҳудуд якҷоя баҳогузорӣ мешаванд. Ин барои банақшагирии таҳкими инфрасохтор дар ҳолати ба миён омадани талабот ба иқтидори иловагӣ асос мегардад.
Истеъмоли нерӯи барқи мактабҳо, кӯдакистонҳо, дармонгоҳҳо ва дигар объектҳои иҷтимоӣ низ дар тавозуни умумии энергетикии маҳалла ба ҳисоб гирифта мешавад.
Барои аҳолӣ бошад, шиносномаи энергетикӣ тасаввуроти дақиқтар дар бораи вазъи низоми энергетикии маҳалла фароҳам меорад. Аз ҷумла, муайян кардан осонтар мешавад, ки кадом шабака бо сарбории зиёд фаъолият дорад, дар куҷо захираи иқтидор маҳдуд аст ва ё дар кадом қитъа беҳтар намудани ҳолати техникӣ ва сохтани инфрасохтори иловагӣ зарур мебошад.
Дар баробари ин, худи шиносномаи энергетикӣ таъминоти нерӯи барқро ба таври худкор беҳтар намекунад, шабакаҳоро таъмир намекунад ва иқтидорро зиёд намесозад. Вазифаи асосии он арзёбии воқеии вазъи маҳалла дар асоси маълумоти дақиқ ва муайян намудани масъалаҳое мебошад, ки бояд дар навбати аввал ҳал карда шаванд.
Корҳои минбаъда бошад, вобаста ба эҳтиёҷоти муайяншуда, имкониятҳои техникӣ ва захираҳои мавҷуда амалӣ карда мешаванд.
Аз ин рӯ, шиносномаи энергетикии маҳалла ваъда нест, балки пойгоҳи иттилоотӣ барои қабули қарорҳои дуруст мебошад.
