Директори генералии Созмони байналмилалии меҳнат Жилбер Ф. Унгбо дар арафаи 35-умин солгарди истиқлоли давлатии Ӯзбекистон тавассути Агентии иттилоотии «Дунё» табрикоти самимӣ ва орзуҳои неки худро ирсол намуд:

– Ҷаноби Олӣ, Президент Шавкат Мирзиёев,

Муҳтарам аъзои Ҳукумат,

Намояндагони созмонҳои корфармоён ва кормандон,

Мардуми азизи Ӯзбекистон!

Табрикоти самимӣ ва гарми маро ба муносибати 35-умин солгарди истиқлоли Ҷумҳурии Ӯзбекистон қабул фармоед.

Ин санаи фархунда имкон медиҳад, ки азми қавӣ, устуворӣ ва дастовардҳои мардуми ӯзбекро эътироф намуда, ба ояндае, ки бар пояи сулҳ, шукуфоӣ ва адолати иҷтимоӣ бунёд меёбад, бо итминон назар афканем. Зеро бе адолати иҷтимоӣ сулҳи пойдор вуҷуд дошта наметавонад. Зиёда аз як аср аст, ки эътиқод ва рисолати асосии Созмони байналмилалии меҳнат маҳз аз ҳамин иборат мебошад.

Соли ҷорӣ ҳамчунин аз оғози ислоҳоти густурда дар доираи консепсияи Ӯзбекистони Нав даҳ сол сипарӣ мегардад. Зери роҳбарии Шумо, Ҷаноби Президент, кишвар ба татбиқи барномаи бузурги дигаргунсозиҳо шурӯъ намуд, ки ба таҳкими ниҳодҳои давлатӣ, навсозии иқтисодиёт, баланд бардоштани мақоми қадру қимати инсон, таъмини некӯаҳволии ҳар як шаҳрванд ва пешбурди принсипҳои меҳнати арзанда равона шудааст.

Ӯзбекистон инчунин мавқеи худро дар арсаи байналмилалӣ ба шарофати дипломатияи фаъол, рушди ҳамкориҳои минтақавӣ ва иштироки созанда дар фаъолияти ниҳодҳои бисёрҷониба, аз ҷумла ба ҳайси узви Шӯрои маъмурии Созмони байналмилалии меҳнат таҳким бахшидааст.

Созмони байналмилалии меҳнат ба ҳамкориҳо бо Ӯзбекистон баҳои баланд медиҳад. Дар давоми даҳ соли охир ҳамкории мо пайваста таҳким ёфта, дар пешбурди ҳуқуқҳои бунёдӣ дар соҳаи меҳнат, аз ҷумла мубориза бо меҳнати кӯдакон ва меҳнати маҷбурӣ, мусоидат ба шуғли арзанда, таҳкими ҳифзи ҳуқуқҳои меҳнатӣ ва рушди муколамаи иҷтимоӣ ба пешрафти назаррас ноил гардид. Ин дастовардҳо ба таври возеҳ собит мекунанд, ки дигаргунсозиҳои устувори иқтисодӣ дар сурате муваффақтар мешаванд, ки ба ҳуқуқҳо, муколама ва ниҳодҳои самаранок такя кунанд.

Мисли ҳар як раванди ислоҳот, дигаргунсозиҳои амалишаванда низ тақвияти минбаъдаи натиҷаҳои бадастомадаро дар як қатор самтҳо тақозо мекунанд. Аз ҷумла, таъмини ҳуқуқҳои бунёдӣ дар соҳаи меҳнат, пеш аз ҳама озодии иттиҳодияҳо, истиқлолияти комили созмонҳои кормандон ва корфармоён, инчунин таҳкими минбаъдаи муколамаи самараноки иҷтимоӣ муҳим мебошад. Мо итминон дорем, ки идомаи ҳамкорӣ ва муколамаи созанда барои расидан ба ин ҳадафҳо дар солҳои оянда мусоидат хоҳад кард.

Дар ҳоле ки Ӯзбекистон ва Созмони байналмилалии меҳнат барои таҳияи Барномаи нави кишварӣ оид ба меҳнати арзанда омодагӣ мебинанд, мо ба марҳилаи навбатии шарикии худ бо хушбинӣ менигарем. Бо талошҳои муштарак мо метавонем муваффақиятҳои бадастомадаро боз ҳам рушд диҳем ва ба имконияту чолишҳои нав самаранок посух гӯем. Созмони байналмилалии меҳнат омода аст минбаъд низ бо Ҳукумати Ҷумҳурии Ӯзбекистон ва шарикони иҷтимоии кишвар дар самти пешбурди меҳнати арзанда ва таҳкими адолати иҷтимоӣ ҳамкориҳоро идома диҳад.

Дар ин соли таърихӣ, ки бо ду солгарди муҳим қайд карда мешавад, ба мардуми Ӯзбекистон сулҳу ваҳдат ва шукуфоӣ орзумандам.

АИ «Дунё»,

шаҳри Женева