Дар Вазорати таҳсилоти олӣ, илм ва инноватсияи Ӯзбекистон натиҷаҳои ниҳоии қабули довталабон ба муассисаҳои таҳсилоти олии кишвар барои соли таҳсили 2026/2027 эълон шуданд.
Дар нишаст намояндагони воситаҳои ахбори омма, мутахассисони соҳа ва аҳли ҷомеа иштирок карданд.
Зимни он натиҷаҳои ниҳоии маъракаи қабул барои соли таҳсили 2026/2027, нишондиҳандаҳои довталабон дар имтиҳонҳои тестӣ, балҳои гузариш аз рӯйи самтҳои таҳсил, инчунин маълумот дар бораи довталабони барои таҳсил аз ҳисоби грант ва шартномаи пулакӣ тавсияшуда пешниҳод гардид.
Ҳамчунин, ба довталабон оид ба имкониятҳое, ки пас аз эълони натиҷаҳои ниҳоии қабул фароҳам меоянд, шартҳои таҳсил бар асоси шартномаи «супер-контракт», амалҳои минбаъдаи довталабони барои донишҷӯ шудан тавсияшуда ва дигар масъалаҳои мубрами марбут ба раванди қабул шарҳҳо дода шуданд.
Дар ҷараёни нишаст иттилоъ дода шуд, ки хидмати қабули ариза барои ҷойгиршавии донишҷӯёни соли якум дар хобгоҳҳои донишҷӯён аз 18 август ба роҳ монда мешавад. Аризаҳоро метавон тибқи тартиби муқарраргардида тавассути Марказҳои хизматрасонии давлатӣ ё портали my.gov.uz пешниҳод кард.
Имсол барои дохил шудан ба самтҳои таҳсилоти бакалаврӣ 677,9 ҳазор нафар довталаб ба таври онлайн ба қайд гирифта шуданд. Раванди қабул бар асоси принсипи «аввал тест — баъд интихоб» дар ду марҳила баргузор гардид.
Имтиҳонҳои тестӣ дар саросари ҷумҳурӣ дар 64 бинои дорои ғунҷоиши зиёд баргузор шуда, ҷараёни онҳо тавассути камераҳои назоратӣ ва пахши мустақими онлайн ба таври ошкор намоиш дода шуд. Қариб 13 ҳазор нафар довталабони дорои сертификатҳои миллӣ ва байналмилалӣ, инчунин 302 нафар довталаби дорои имтиёзҳои муқарраргардида аз супоридани имтиҳонҳои тестӣ озод карда шуданд.
Тибқи натиҷаҳои тестҳо, 389,1 ҳазор нафар довталаб ҳуқуқи иштирок дар озмунро пайдо карданд. Дар марҳилаи дуюм ба онҳо имконият дода шуд, ки бо назардошти натиҷаҳои бадастовардаашон муассисаи таҳсилоти олӣ, самти таҳсил ва шакли таҳсилро интихоб кунанд.
