Дар доираи даври 16-уми Лигаи олии занонаи Ӯзбекистон се бозӣ баргузор шуда, дастаҳои «Қизилқум-W», «Динамо-W» ва «ОКМК-W» бар рақибонашон пирӯз шуданд.
«Қизилқум-W» дар майдони худ «Бухоро-W»-ро қабул карда, бо ҳисоби 3:0 пирӯзии боэътимод ба даст овард. Дар дақиқаи 17 Холида Дадабоева ҳисобро боз кард. Дилдора Нозимова бошад, дар дақиқаҳои 42 ва 48 ду гол ба самар расонида, дубл анҷом дод.
Дар Самарқанд дидори «Динамо-W» ва «Бунёдкор-W» бо ҳисоби ҳадди ақал ба анҷом расид. Голи ягонаи вохӯриро дар дақиқаи 51 Албина Бобоқулова ба ҳадаф расонида, ба «Динамо-W» пирӯзии 1:0-ро таъмин кард.
Пурсамартарин бозии давр миёни дастаҳои «Суғдиёна-W» ва «ОКМК-W» баргузор шуд. Дар ин дидор дастаи Олмалиқ бо ҳисоби калони 7:2 пирӯз гардид.
Дар ҳайати «ОКМК-W» Шаҳзода Алихонова хет-трик анҷом дода, дар дақиқаҳои 30, 40 ва 62 се гол зад. Ҳамчунин Ёдгорхон Юсупова, Нозимахон Эргашева, Гулсевар Қӯрғонова ва Сетора Такабоева низ ба номи худ гол сабт карданд. Голҳои ҷавобии «Суғдиёна-W»-ро Дилнура Маматқулова ва Лейла Рустуллаева ба ҳадаф расониданд.
Бозии дигари давр миёни «Севинч» ва «Локомотив-W» ба далели иштироки дастаи Қаршӣ дар мусобиқаи байналмилалӣ ба муҳлати дигар гузаронида шуд.
