Бо Қонуни Ҷумҳурии Ӯзбекистон аз 11 сентябр таҳти №ӮРҚ–1174, ки ба таҳкими ҳифзи кӯдакон аз зӯроварӣ равона шудааст, ба қонунгузорӣ як қатор тағйиру иловаҳо ворид гардид.

Тибқи тағйироти нав, барои нисбат ба кӯдаки ноболиғ дар муассисаи таълимӣ содир намудани зӯроварии ҷисмонӣ, инчунин таҳқир ё паст задани шаъну шарафи ӯ, аз 1 то 5 баробари МҲБ ҷарима ситонида мешавад. Ин меъёр дар ҳолатҳое татбиқ мегардад, ки дар кирдори содиршуда нишонаҳои ҷиноят ё дигар ҳуқуқвайронкунӣ мавҷуд набошанд.
Ҳамзамон, шахсе, ки дар ҷараёни фаъолияти педагогӣ нисбат ба кӯдак зӯроварии ҷисмонӣ ё равонӣ содир карда, ба ҷавобгарии маъмурӣ кашида шудааст, дар давоми як сол ҳаққи машғул шудан ба фаъолияти педагогиро надорад.
Ин маҳдудият ба муассисаҳои таҳсилоти томактабӣ, таҳсилоти умумии миёна ва миёнаи махсус, таълими касбӣ, инчунин муассисаҳои таълими иловагӣ барои кӯдакон дахл дорад.
Қонун ҳамчунин масъалаи пардохти алиментро ба нафъи кӯдаконе, ки таҳти таъминоти пурраи муассисаҳои давлатӣ ё ғайридавлатӣ қарор доранд, танзим мекунад. Минбаъд падар ё модаре, ки тибқи қонун вазифадор аст барои чунин кӯдак алимент пардохт кунад, аз ин уҳдадорӣ озод карда намешавад.
Илова бар ин, ҳангоми баррасии масъалаи кам кардани ҳаҷми алименте, ки ба нафъи кӯдаки аз парастории падару модар маҳрумшуда ситонида мешавад, марказҳои хизматрасонии иҷтимоии «Инсон» ҷалб карда мешаванд.
Қонун аз рӯзи расман нашр шуданаш эътибор пайдо кардааст.