Ба муносибати 35-умин солгарди Истиқлолияти Ӯзбекистон озмуни видеоии «Роҳи шарафнок» байни ҷавонони эҷодкор ташкил карда шуд.

Озмун бо ташаббуси Иттифоқи рӯзноманигорон ва ҳамкории Вазорати фарҳанг баргузор гардид. Ҳадафи асосии озмун дастгирии журналистон ва салоҳияти эҷодии блогерони ҷавон, ташвиқи инъикоси босамари ҳаёти Ватан, истиқлолият ва мамлакат тавассути расонаҳои муосир ва рушди таҳияи муҳтавои видеоии босифат буд.  

«Роҳи шарафнок» дар се самт ташкил карда шуд: «Видеои беҳтарин», «Беҳтарин наворе, ки бо ёрии зеҳни сунъӣ таҳия шудааст», «Беҳтарин видеое, ки дар асоси мобилография сохта шудааст».

Аз рӯзи эълони озмун то 28 август асарҳои эҷодӣ қабул карда шуданд. Дар ин давра эҷодкорони ҷавон наворҳоро дар мавзӯъҳои гуногун, ки дар асоси равиши муосир ва ғояҳои эҷодӣ таҳия шудаанд, пешниҳод карданд. Рафти озмун, эълон ва чорабиниҳои муҳим дар шабакаи расмии телегроми Иттиҳоди журналистони Ӯзбекистон инъикос карда шуд. Корҳои эҷодӣ аз ҷониби ҳакамони касбӣ дар асоси мизонҳои муайяншуда таҳлил карда шуданд. Ҳангоми баҳогузорӣ ба ғояи асар, маҳорати кушода додани мавзӯъ, монтаж, бадеият ва ба талаботи медиаи замонавӣ ҷавобгӯ будани мавзӯъҳо эътибор дода шуд. Дар натиҷа, асарҳои эҷодии муносиб интихоб ва ғолибон эълон карда шуданд.

Як гурӯҳ рӯзноманигорон  ба узвияти Иттифоқи журналистон пазируфта шуданд. Инчунин, дар чаҳорчӯби чорабинӣ филми бадеии «Журналист» намоиш дода шуд.

Озмуни «Роҳи шарафнок» бешак, ба намоён намудани имконият ва иқтидори эҷодии ҷавонон, дар муҳити медиаи замонавӣ мавқеи худро ёфтани онҳо хидмат мекунад.

С. Бекназарова,

хабарнигори

«Овози тоҷик».