Дар Ӯзбекистон барои шаҳрвандоне, ки зарфҳои пластикӣ, шишагӣ ва алюминии нӯшокиҳоро ба фандоматҳои махсус месупоранд, барои ҳар як зарф то 150 сӯм маблағ пардохт карда мешавад.

Лоиҳаи мазкур дар ҳамкорӣ миёни Агентии идоракунии партовҳо ва рушди иқтисоди даврӣ ва ширкати норвегии TOMRA, ки дар соҳаи технологияҳои автоматии ҷамъоварӣ ва ҷудокунии партовҳо фаъолият мекунад, амалӣ мегардад.
Дар доираи лоиҳаи озмоишӣ низоми ҳавасмандгардонии аҳолӣ барои алоҳида ҷамъоварӣ ва супоридани зарфҳои пластикӣ, шишагӣ ва алюминии нӯшокиҳо барои коркард ҷорӣ шудааст.
Акнун сокинон метавонанд зарфҳои нӯшокиҳои ҷудошударо ба фандоматҳои махсус супорида, барои ҳар як зарф 150 сӯм маблағи ҳавасмандӣ гиранд.
Шаҳрванд ҳангоми истифодаи дастгоҳ метавонад яке аз ду роҳро интихоб кунад. Дар ҳолати аввал, барои ҳар як зарфи қабулшуда 150 сӯм пардохт шуда, маблағ ба ҳамёни электронии Click гузаронида мешавад.
Дар ҳолати дуюм, шаҳрванд метавонад маблағи худро ба корҳои хайрия равона кунад. Дар ин сурат маблағе, ки аз фурӯши зарфҳои ҷамъоваришуда ба даст меояд, барои корҳои хайриявӣ ва ташаббусҳои ниҳолшинонӣ сарф хоҳад шуд.
Фандоматҳо имкон медиҳанд, ки зарфҳои нӯшокиҳо аз дигар партовҳои маишӣ ҷудо ҷамъоварӣ ва барои коркард омода карда шаванд. Аз маводи ҷудошуда ашёи хоми такрорӣ истеҳсол шуда, он метавонад дар истеҳсоли маҳсулоти нав дубора истифода шавад.
Ин тадбир ба коҳиш додани истифодаи захираҳои табиӣ ва ҳамчунин кам шудани партовҳое, ки ба кӯчаҳо, обанборҳо ва партовгоҳҳо ворид мешаванд, мусоидат хоҳад кард.
Яке аз ҳадафҳои дигари лоиҳа ба одати ҳамарӯза табдил додани ҷудокунии партовҳо ва баланд бардоштани фарҳанги экологии аҳолӣ мебошад. Ташаббус ҳамчунин ба он равона шудааст, ки зарфи истифодашудаи нӯшокӣ ҳамчун партови одӣ не, балки ҳамчун захираи коркардшаванда ва дорои арзиши иқтисодӣ пазируфта шавад.
Дар сурати бомуваффақият гузаштани лоиҳаи озмоишӣ, дар оянда насби фандоматҳо дар ҷойҳои серодами шаҳру ноҳияҳои ҷумҳурӣ марҳила ба марҳила ба роҳ монда мешавад.