Ширкати Google дар доираи лоиҳаи Suncatcher, ки ба таъсиси инфрасохтори зеҳни сунъӣ дар кайҳон равона шудааст, нахустин моҳвораи озмоишии худро ба мадор мебарорад.
Ҳадафи ин озмоиш санҷиши фаъолияти протсессорҳои TPU дар шароити кайҳон мебошад.
Тибқи иттилои хадамоти матбуотии ширкат, пас аз чанд соли таҳқиқот лоиҳаи Suncatcher барои нахустин озмоиши худ дар мадор омода шудааст. Дар ҷараёни он протсессорҳои Tensor Processing Unit (TPU)-и Google дар фазои кайҳон санҷида мешаванд.
Ҳадафи асосии лоиҳа ба мадори пасти Замин баровардани моҳвораҳое мебошад, ки бо инфрасохтори зеҳни сунъӣ муҷаҳҳаз шудаанд. Тибқи ҳисобҳои пешакии ширкат, дастгоҳҳои кайҳонӣ метавонанд нисбат ба дастгоҳҳои рӯйи Замин то 8 баробар бештар энергия тавлид кунанд.
Нахустин моҳвораи муҷаҳҳаз бо протсессорҳои TPU 1 октябри соли 2026 ба кайҳон фиристода мешавад. Онро киштии кайҳонии Transporter-18, ки аз ҷониби ширкати Planet дар ҳамкорӣ бо SpaceX таҳия шудааст, ба мадор мебарорад, хабар медиҳад Kazinform.
