Ба кормандони соҳаи тандурустии Ӯзбекистон

Дӯстони азиз!

Дӯстони азиз!

Шуморо, ки ҳаёти худро ба чунин як вазифаи масъулиятнок ва фахрӣ, ба монанди ҳифзи саломатии мардум бахшидаед, бо иди касбиатон - Рӯзи кормандони тибб самимона муборакбод менамоям ва ба ҳамаи шумо эҳтироми амиқ ва орзуҳои беҳтарини худро мерасонам.

Мардуми мо Шуморо ҳамчун намояндагони касби дар ҷаҳон наҷиб, одамони воқеан фидокор, ба қасами муқаддаси худ содиқ мебинанд ва меҳнати пурмашаққати шуморо баланд қадр мекунанд.

Хусусан, дар шароити мураккаби кунунии пандемияи коронавирус шумо ҳамчун  муҳофизони воқеии саломатии миллат мебароед, ки сазовори эътирофи олӣ мебошад. Албатта, хидматҳои шумо дар табобати ҳазорон ҳамватанони мо аз чунин бемории хатарнок қиёснопазир аст.

Бо истифода аз ин фурсат, аз номи тамоми халқамон ва аз номи худам ба ҳамаи кормандони тибб, ки дар сафи пеши ин муборизаи бераҳмона истода, ҷони худро дар хатар гузошта, ба ҳама намунаи мардонагӣ ва матонат нишон медиҳанд, изҳори сипос менамоям.

Мӯҳтарам мутахассисони соҳаи тандурустӣ!

Мо дар назди худ мақсади баланди ба халқамон таъмин кардани зиндагии шоиста ва шукуфонро гузоштаем ва дар ин роҳ ба рушди босуръати соҳаи тандурустӣ аҳамияти аввалиндараҷа медиҳем.

Дар тӯли чаҳор соли охир мо якҷоя бо шумо дар ин самт кори бузургеро анҷом додем. Бояд қайд кард, ки дар ин давра дар соҳа тақрибан 200 санади меъёрию ҳуқуқӣ, аз ҷумла Консепсияи рушди соҳаи тандурустии Ҷумҳурии Ӯзбекистон қабул карда шуд.

Дар кишвар хидматрасонии кӯмаки аввалияи тиббию санитарӣ, ёрии таъҷилӣ ва таъҷилии тиббӣ, расонидани хадамоти махсус такмил дода мешавад. Дар самти коҳиш додани фавти модару кӯдак, ташхиси барвақти бемориҳо, ташаккули тарзи ҳаёти солим дар оилаҳо, баланд бардоштани маданияти тиббии аҳолӣ ва дароз кардани дараҷаи миёнаи умри аҳолӣ натиҷаҳои назаррас ба даст оварда шуданд.

Тавре ки шумо медонед, соли 2020 барои соҳаи тандурустии Ӯзбекистон соли озмоишҳои пештар мислаш диданашуда ва ҳамзамон давраи рушди пайваста, ба даст овардани таҷрибаи нав гардид.

Барои ислоҳоти соҳа аз буҷаи давлатӣ 14,8 триллион сӯм ҷудо карда шудааст -- ин нисбат ба соли 2019 1,2 маротиба зиёдтар аст ва дар доираи Барномаи инвеститсионӣ ба соҳа 1,15 триллион сӯм ҷудо карда шуд, ки имкон дод, сарфи назар аз мушкилоти мавҷуда, корҳои бузург иҷро карда шаванд. Аз ҷумла, дар муддати кӯтоҳ дар марказ ва маҳалҳо муассисаҳои табобатию профилактикӣ, минтақаҳои карантинӣ ва марказҳои тақсимотӣ сохта шуданд. Дар ноҳияи Зангиотаи  вилояти Тошканд беморхонаи махсусгардонидашудаи бисёрсоҳавӣ бо 4000 кат кушода шуд.

Бояд гуфт, ки ин тадбирҳои саривақтӣ имрӯз натиҷаҳои мусбат дода истодаанд.

Бо мақсади беҳтар гардондани сифат ва васеъ намудани расонидани ёрии тиббӣ ба занони синни репродуктивӣ, занони ҳомила ва кӯдакон марказҳои замонавии тиббӣ, аз ҷумла, Маркази дуввуми перинаталии шаҳри Тошканд ва Маркази миллии тиббии кӯдакони  бо технологияҳои пешрафта муҷаҳҳаз сохта шудаанд, ки дар онҳо барои гузаронидани зиёда аз 1500 ҷарроҳии мураккаб шароит мавҷуд аст.

Системаи нави ҳавасмандгардонии шоистаи кормандони соҳа, зиёд кардани музди меҳнат ва кӯмакпулиҳои иловагӣ барои табибоне, ки дар шароити пандемия кор мекунанд, ҷорӣ карда шуданд.

Имсол дар деҳаҳои дурдаст 798 поликлиникаи оилавӣ кушода шуд, ки дар он ҷо дорухонаҳои иҷтимоӣ, бунгоҳҳои ёрии таъҷилии тиббии шабонарӯзӣ, маслиҳатхонаҳои занон,  утоқҳои ҳифзи саломатии духтарони наврас таъсис дода шуданд ва ин кор дар байни корҳои муҳиме, ки мо анҷом дода истодаем, мавқеи махсусро ишғол намуд. Ғайр аз ин, аз ҳисоби ҷалби мутахассисони танги 5 самт -- акушерӣ ва гинекология, ҷарроҳӣ, стоматология, терапия, педиатрия -- низоми ба сокинони деҳот пешниҳод намудани ёрии амбулатории тахассусӣ ҷорӣ карда шудааст.

Ба туфайли корҳое, ки солҳои охир дар самти рушди шабакаи марказҳои махсуси илмию амалии тиббӣ гузаронида шуданд, шумораи умумии онҳо ба 18 адад расид ва 18 филиали онҳо низ дар минтақаҳо кушода шуданд. Дар ин ҷо амалиёти мураккаби кӯчондани гурда ва ҷигар гузаронида мешаванд. Ҳатто марказҳои минтақавӣ амалиёти кардиоҷарроҳиро дар  дили кушод аз худ кардаанд.

Дар айни замон, дар кишвар 5805 муассисаи хусусии тиббӣ фаъолият доранд, ки ба беҳтар шудани сифати хизматрасонии тиббӣ ва афзоиши рақобат дар соҳа мусоидат мекунанд. Имрӯз, зиёда аз 70 нафари онҳо барои ташхиси сирояти коронавирус хадамоти лабораторӣ пешниҳод мекунанд, 25 клиника бо ташхис ва табобати он машғуланд. Бояд қайд кард, ки корҳои ҷории таҳкими бахши хусусӣ дар соҳаи тиб дар шароити ҳозираи душвор худро пурра сафед мекунад.

Шумораи муассисаҳои тиббие, ки дар асоси шарикии давлатӣ ва хусусӣ кор мекунанд, меафзояд. Ин далели он аст, ки имсол 9 лоиҳаи шарикии давлатию хусусӣ ва 187 лоиҳаи аутсорсинг ба маблағи умумии 51,4 миллиард сӯм амалӣ карда шуданд.

Тавре ки шумо медонед, Фонди рушди ёрии таъҷилии тиббӣ таъсис дода шудааст. Аз ҳисоби маблағи фонд истгоҳи ёрии таъҷилии шаҳри Тошканд 150 мошини ҳозиразамони махсуси "Форд" гирифт. Ҳамин тариқ, шумораи мошинҳои ёрии таъҷилӣ дар ҷумҳурӣ ба 2514 адад расидааст. Аз ҳама муҳимаш сифати хизматрасониҳо мунтазам беҳтар мегардад.

Бори аввал Консепсияи хизматрасонии гемодиализ таҳия карда шуд ва ҳоло татбиқи он оғоз ёфтааст.

Масъалаи дигари мубрами рӯз -- татбиқи лоиҳаҳои муҳим оид ба тайёр кардани кадрҳои баландихтисос барои соҳа мебошад. Дар ин росто, он чиз аҳамияти калон дорад, ки дар соли 2020 квотаҳо барои қабул ба донишгоҳҳои тиббӣ: аз рӯи барномаҳои бакалаврӣ - 27 фоиз, магистратура - 28 фоиз ва дар ординатураи клиникӣ - 22 фоиз зиёд карда шуданд, таҳсил аз рӯи ихтисосҳои нав ба роҳ монда шуд.

Дар айни замон дар ҳамкорӣ бо муассисаҳои таҳсилоти олии Олмон, Италия, Русия, Кореяи Ҷанубӣ, Туркия, Беларус, Украина ва дигар кишварҳо барномаҳои муштараки таълимӣ амалӣ карда мешаванд, ки дар доираи он донишҷӯёни мо ихтисосҳои серталабро азхуд мекунанд.

Мӯҳтарам кормандони соҳа!

Албатта, ҳамаи мо хуб мефаҳмем, ки натиҷаҳои ислоҳотамон дар соҳаи тандурустӣ пеш аз ҳама аз меҳнати садоқатмандона, маҳорат ва таҷрибаи табибон ва ҳамшираҳои мӯҳтарами мо, инчунин профессорон, омӯзгорон ва муҳаққиқон, ки сирри илми тибро ба ҷавонон меомӯзонанд, вобаста аст.

Дар ҷамъомади калоне, ки дар арафаи Рӯзи кормандони тиб баргузор гардид, мо вазифаҳои муҳимтарин ва таъхирнопазири рушди соҳаи миллии тандурустиро дар асоси талаботи замон, таҳкими пойгоҳи моддию техникии он, барвақт ошкор сохтани бемориҳо, пурзӯр намудани корҳои профилактикӣ, алалхусус ба таври васеъ ҷорӣ намудани тарзи ҳаёти солим дар ҷомеа, ҷорӣ намудани технологияҳои рақамӣ, усулҳои инноватсионӣ дар равандҳои ташхис ва табобат муайян намудем.

Боварӣ дорам, ки шумо, қаҳрамонони воқеии замони мо, ки якҷоя бо тамоми мардум озмоишҳои ҳозираро мардонавор паси сар карда истодаед, дар иҷрои чунин вазифаҳои муҳим фаъолона иштирок хоҳед кард.

Дар маркази диққати мо минбаъд низ масъалаҳои муносиб ҳавасмандгардонии меҳнати вазнин ва наҷиби шумо, тайёр кардани кадрҳои баландихтисос, баланд бардоштани рақобатпазирии соҳаи тандурустии кишвар, таҳкими ҳамкорӣ бо Созмони умумиҷаҳонии тандурустӣ ва марказҳои тиббии хориҷӣ ва рушди телемедитсина хоҳад буд.

Бори дигар шуморо бо иди касбиатон самимона табрик мегӯям. Ба ҳамаи шумо саломатӣ, хушбахтии оилавӣ ва беҳбудӣ таманно дорам!

 

Шавкат Мирзиёев,

Президенти Ҷумҳурии Ӯзбекистон

 

 

ТАФСИРИ ХУДРО ГУЗОРЕД: