Алҳол технологияҳои иттилоотии замонавӣ дар тамоми соҳаҳо бо шиддат ворид шуда, дар ҳаёти рӯзмарраи инсон мустаҳкам ҷой мегиранд.
Алҳол технологияҳои иттилоотии замонавӣ дар тамоми соҳаҳо бо шиддат ворид шуда, дар ҳаёти рӯзмарраи инсон мустаҳкам ҷой мегиранд. Имрӯз ҳаётамонро бидуни технологияҳои иттилоотӣ ва инноватсионӣ тасаввур карда намешавад.
Баъди аз ҷониби Сарвари давлат дар мамлакат Соли илм, маърифат ва рушди иқтисодиёти рақамӣ эълон гардидани соли 2020 дар ин ҷода корҳои васеъмиқёс амалӣ гардиданд. Ин иқдом бо қарори Президент «Дар бораи чорабиниҳо оид ба васеъ татбиқ намудани иқтисодиёти рақамӣ ва ҳукумати электронӣ», ки 28 апрели соли равон ба имзо расид, мустаҳкамтар шуд.
Ҳоло дар соҳаҳои саноат, хоҷагии қишлоқ, саноати сабук, нигаҳдории тандурустӣ ва таълим технологияҳои инноватсионӣ ҷорӣ карда шудаанд.
Дар мамлакат барои мо – ҷавонон шароит ва имкониятҳои васеъ фароҳам оварда мешаванд. Вазорати рушди технологияи иттилоотӣ ва коммуникатсионӣ дар ҳудудҳо барои бо технологияҳои рақамӣ таъмин кардан беш аз 100 марказҳои таълимиро вазифадор кардааст.
Ба мутахассисони соҳа низ эътибори зиёд дода мешавад. Соли гузашта дар ноҳияи Мирзо Улуғбеки шаҳри Тошканд парки масолеҳи барномавӣ ва технологияи иттилоотӣ ба фаъолият шурӯъ кард.
Дар шаҳрҳои Андиҷон ва Марғилон филиалҳои IT-паркҳо ташкил гардиданд. Дар пойтахти мамлакатамон – Тошканд мактаби технологияҳои иттилоотии ба номи Муҳаммад ал-Хоразмӣ ба фаъолият шурӯъ намуд. То охири соли ҷорӣ дар шаҳрҳои Гулистон, Бухоро, Намангон, Нуқус, Самарқанд, Урганҷ ва Ҷиззах ташкил кардани чунин паркҳо дар назар дошта шудааст.
Беҳтар кардани инфрасохтори IT-паркҳо ва баланд бардоштани дониши ҷавонон талаби давр ба шумор меравад. Дар ин самт ба мо мутахассисони соҳибихтисос, профессор ва омӯзгорони соҳибтаҷриба кӯмак мерасонанд.
Чанде пеш аз тарафи кафедраи информатика ва технологияҳои иттилоотии Донишкадаи муҳандисиву сохтмони Намангон таҳти унвони «Ҷавонони ташаббускор – ояндаи мамлакат» бо риоя кардан ба талаботи пандемияи коронавирус ба тарзи онлайн конфронси илмию амалӣ баргузор гардид.
Конфронс бо усули платформаи «ZOOM» басо шавқовар ва ҷолиби диққат гузашт. Дар он профессору омӯзгорон, барномасозон ва донишҷӯёни магистр, ки дар ИМА, Ҷопон, Олмон, Русия, Испания ва Италия мехонанду фаъолият мебаранд, фаъол иштирок намуданд. Инчунин бо намояндагони тиҷорат, ки дар мамлакатамон фаъолият доранд, мулоқот ба амал омад.
Дар тадбир бинобар соҳаи IT дар кишварамон комёбиҳои ноилгардида ва камбудиҳои мавҷуда ҳамаҷониба муҳокима карда шуданд.
Оре, ояндаи мамлакат дар дасти мо аст. Бинобар ин бояд аз шароитҳои мусоиди фароҳамовардашуда самаранок истифода барем ва дар пешрафти кишвар ҳиссаи худро гузорем.
Ҳоҷиакбар ҲАСАНОВ,
донишҷӯйи факултаи энергетика ва хабарикунонии саноатии Донишгоҳи муҳандисиву сохтмони Намангон.
