БАРОИ БАЧАҲО

МАНУ ҶӮРАҲОИ МАН

БАРОИ БАЧАҲО

Убайд РАҶАБ,
Шоири халқии Тоҷикистон, Барандаи диплом — ҷоизаи байналхалқии ба номи Ҳ. К. Андерсен.

МАНУ ҶӮРАҲОИ МАН

Ману ҷӯраҳои ман,
Як деҳаи пурастем.
Ману ҷӯраҳои ман,
Дар деҳа машҳурастем.

Ҷое, ки ҷойи кор аст,
Ҷойи мо бошад он ҷо.
Хурд магӯ, ҳама кор
Меояд аз дасти мо.

Холаи Марям бе кас,
Вале магир танҳояст.
Мо хабаргирони ӯ,
Холаи ҷони мояст.

Рамаи деҳ дар Тагоб,
Чӯпон — акои Тилло.
Кӣ боғашро диҳад об?
Кӣ мебуд? Албатта, мо.

Хатро кӣ мекашонад,
Нотоб амаки Равшан.
Кӣ мебуд? Албатта, мо —
Ману ҷӯраҳои ман.

ГУЛЪУЗОР

Як даста гул бичидем,
Ду даста гул бичидем.
Дар паҳлӯи гули хор.
Мо Гулъузора дидем.

Чил кокули Гулъузор,
Мисли чил шадда марҷон.
Рӯмолаш ранги лола,
Куртааш ранги алвон.

Чӣ мечинад Гулъузор.
Дар паҳлӯи гули хор?
Ба апаву акояш,
Гул мечинад Гулъузор.

Шеъри ҳамзабонон

Партав НОДИРӣ
(Афғонистон)

ЯК ДАРЁЧА
 СУРУД

Шаб асту  най навозад
 найнавозе,
Саропо оташу сӯзу гудозе.
На дар майхонаҳо номе зи  соғар,
На бар гулдастаҳо бонги намозе.
***
Шаб асту дар дилам шӯри саҳар 
нест,
Маро аз ту, туро аз ман хабар 
нест.
Миёни мову ту дарёи хунин,
Аз ин дарё магар роҳи гузар нест.
***
Зи дарё мавҷи гавҳар бор н-ояд, 
Даҳон бикшуда ғайр аз мор н-ояд.
Ҳазорон кас зи  бедорӣ сухан 
гуфт,
Валекан як дили бедор н-ояд.
***
Дили сарде чу оҳан дорӣ, ай шаб.
Зи хонам гул ба доман дорӣ ай 
шаб,
Ту зулматхонае аз кина лабрез, 
Агарчи моҳи равшан дорӣ ай шаб. 
***
Шаби ман ҷилваи нуре надорад,
Ки Мусои замон Туре надорад.
Шикаста бод дасти боғбоне,
Ки дар кангина ангуре надорад.
***
Шукӯҳи офариниш ноз нозӣ,
Хулуси дил ба ҳангоми намозӣ. 
Суруди ишқаму аммо шабона,
Маро дар нойи танҳоӣ навозӣ. 
***
Шабона дар сарам шӯри шабона,
Дили ман ҷилваи тӯри шабона.
Саропо офтоби интизорам,
Шавад то пухта ангури шабона!

ТАФСИРИ ХУДРО ГУЗОРЕД: