Бо мақсади такмил додани низоми маблағгузории хароҷоти рӯёндан ва ҷамъоварии пахта, баланд бардоштани ҳавасмандии истеҳсолкунандагони ашёи хоми пахта ва фароҳам овардани шароити мусоид барои коркарди амиқи маҳсулот:

Бо мақсади такмил додани низоми маблағгузории хароҷоти рӯёндан ва ҷамъоварии пахта, баланд бардоштани ҳавасмандии истеҳсолкунандагони ашёи хоми пахта ва фароҳам овардани шароити мусоид барои коркарди амиқи маҳсулот:
1. Аз ҳосили соли 2022 сар карда тартиби маблағгузории парвариши ашёи хоми пахта ва ҷамъоварии пахта аз ҳисоби Фонди дастгирии давлатии кишоварзӣ (минбаъд – Фонд) ҷорӣ карда шавад, ки тибқи он:
а) маблағгузории имтиёзнок барои парвариши ашёи хоми пахта ва ҷамъоварии пахта тавассути кластерҳои пахтаю нассоҷӣ ва хоҷагиҳои тухмипарварии элита дар таркиби Маркази рушди тухмипарварӣ сурат мегирад;
б) бонкҳои тиҷоратӣ аз ҳисоби маблағҳои Фонд барои инҳо қарзҳои имтиёзнок ҷудо мекунанд:
ба кластерҳои пахтаву нассоҷӣ барои рӯёндани пахта – ба миқдори то 60 фоизи нархи ашёи хоми пахта бинобар ставкаи 10 фоизи солона ( аз он ҷумла маржаи бонк – 2 фоиз) ба муҳлати 24 моҳ, аз ҷумла давраи имтиёзноки 18 моҳ, аз моҳи 19-ум – бо шарти дар давоми 6 моҳи оянда бо ҳиссаҳои баробар баргардонидан;
хоҷагиҳои тухмипарварии элита дар ҳайати Маркази рушди тухмипарварӣ барои рӯёндани ашёи хоми пахта – ба миқдори то 60 фоизи нархи ашёи хоми пахта бинобар ставкаи 10 фоизи солона (аз ҷумла маржаи бонк - 2 фоиз) ба мӯҳлати 14 моҳ;
кластерҳои пахтаву нассоҷӣ ва хоҷагиҳои тухмипарварии элита дар таркиби Маркази рушди тухмипарварӣ барои маблағгузории ҷамъоварии пахта – ба миқдори то 20 фоизи арзиши ашёи хоми пахта бинобар ставкаи 10 фоизи солона (аз он ҷумла маржаи бонк – 2 фоиз) ба муҳлати 12 моҳ, аз ҷумла давраи имтиёзнок – 3 моҳ.
2. Тартибе муқаррар карда шавад, ки мувофиқи он ба кластерҳои пахта ва нассоҷӣ аз ҳисоби Фонд ҷубронпулӣ барои пӯшонидани як қисми ставкаи фоизӣ оид ба қарзҳои тиҷоратӣ, ки бо пули миллӣ ба мӯҳлати то 12 моҳ барои ҳисоббаробарии ниҳоии хариди ашёи хоми пахта ҷудо карда шуда,  аз ставкаи асосии Бонки марказӣ баланд аст, аммо на беш аз банди 10 фоиза пардохта мешавад. Дар баробари ин, хароҷоти ҷуброни қарзҳои тиҷоратӣ,  ки барои ҳисоббаробаркунии ниҳоӣ ҷудо карда мешаванд, аз ҳисоби Буҷети ҷумҳуриявии Ҷумҳурии Ӯзбекистон маблағгузорӣ карда мешаванд.
3. Муайян карда шавад, ки:
аз ҳосили соли 2023 сар карда маблағгузории хароҷоти парвариши пахта аз ҷониби кластерҳои пахтаю нассоҷӣ ва хоҷагиҳои тухмипарварии элита дар таркиби Маркази рушди тухмипарварӣ аз 1 октябри соли қаблии соли ҳосили мувофиқ оғоз мегардад;
кредитҳои имтиёзноки ба кластерҳои пахта ва нассоҷӣ барои парвариши ашёи хоми пахтаи ҷудошаванда ба хоҷагиҳои фермерӣ барои маблағгузории тадбирҳои агротехникӣ вобаста ба парвариши ашёи хоми пахта, ба истиснои қарзҳое, ки ба кластерҳои пахта ва нассоҷӣ барои парвариши ашёи хоми пахта дар заминҳои кишоварзии аз ҷониби онҳо ба иҷора гирифташуда ҷудо карда шудаанд, равона карда мешаванд;
пешпардохти кластерҳои пахтаю нассоҷӣ ба хоҷагиҳои фермерӣ барои парвариши ашёи хоми пахта бо пули нақд сурат мегирад. Дар ин маврид ба пешпардохти натуравӣ иҷозат дода намешавад;
масъалаҳои вобаста ба нуриҳои минералӣ, маводи сӯзишворию молиданӣ, таҷҳизот ва хизматрасонии техникӣ (ба истиснои воситаҳои кимиёвии хифзи растаниҳо), аз ҷумла воридоти онҳо аз тарафи истеҳсолкунандагони маҳсулоти хоҷагии қишлоқ мустақилона ҳал карда мешаванд, дахолат ба ҳалли ин масъалаҳо дар ҳар шакл манъ аст. 
4. Бо мақсади ташкили мониторинги доимии самаранокии истифодаи маблағҳои ҷудокардаи Фонд ва вазъи молиявии кластерҳо дар сохтори Фонд аз ҳисоби ихтисори воҳидҳои мавҷудаи  штатии Сарраёсати назорати давлатии молиявии Вазорати молия ва идораҳои ҳудудии он шуъбаи иборат аз 5 воҳиди штатӣ ташкил карда шавад. 
Ба Фонд ҳуқуқ дода шавад, ки дар асоси шартнома бо ҷалби ташкилотҳои аудиторӣ ва машваратии тиҷоратӣ аудити самарабахшии истифодабарии маблағҳои ба онҳо ҷудо кардашударо гузаронад.
5. Бонки марказӣ, Вазорати кишоварзӣ, Вазорати адлия, Вазорати рушди иқтисод ва паст кардани сатҳи камбизоатӣ якҷоя бо вазорату идораҳои манфиатдор дар мӯҳлати се моҳ ба Девони Вазирон маҷмӯи санадҳои меъёрии ҳуқуқиро тақдим намоянд, ки инҳоро пешбинӣ менамояд:
талабот ба анборҳои мол, тартиби таъмини иҷрои ӯҳдадориҳои тарафҳо оид ба ташкили фаъолияти анборҳо ва молу мулки барои нигаҳдошт дода шуда, инчунин талабот ба шаҳодатномаи анбор, ки дар ҳисоби қатъӣ меистад;
ташаккул додани Феҳристи ягонаи шаҳодатномаи анборӣ, ки миқдор, намуд, муҳлати нигоҳдорӣ ва маълумоти дигарро дар бораи моле, ки барои нигоҳдорӣ ба анбор дода шудааст, инъикос менамояд,  инчунин ба роҳ мондани мубодилаи электронии маълумотҳо байни субъектҳои соҳибкорӣ, бонкҳои тиҷоратӣ ва мақомоти идоракунии давлатӣ.
Ба бонкҳои тиҷоратӣ тавсия дода шавад, ки то қабули ҳуҷҷатҳои қонунгузорӣ, ки  дар сархати якуми ҳамин банд пешбинӣ шудааст, ба сифати гарав захираи калобаи кластерҳои пахтаю нассоҷиро барои ба кредит додани онҳо дар ҳолати агар ин захира аз ӯҳдадориҳои қарзӣ ва гарав озод бошад, қабул намояд. Дар ин маврид ихтиёрдории захираи риштае, ки ба гарав гирифта шудааст, дар асоси розигии бонки тиҷоратӣ – гаравгир сурат мегирад.
6. Муовини Сарвазир Ҷ. А.  Қӯчқоров ва вазири молия Т.А. Ишметов ба мақсади беист маблағгузорӣ намудани чорабиниҳои вобаста ба рӯёндани маҳсулоти кишоварзӣ ба Фонд дар соли 2022 аз Буҷаи ҷумҳуриявии Ҷумҳурии Ӯзбекистон ҷудо кардани  ёрии беподоши молиявиро ба миқдори 5 триллион сӯм, бинобар ҳисобу китоби асосноки Фонд — қарзи бюҷетӣ ба маблағи то 7,5 триллион сӯм таъмин намоянд.
7. Муқаррар карда шавад, ки қарзҳои имтиёзнок барои парвариши ашёи хоми пахтаи ҳосили соли 2021, ки ба кластерҳои пахтаю нассоҷии дорои иқтидорҳои коркарди нахи пахта ҷудо карда шудаанд, аз моҳи сентябри соли 2022 дар давоми шаш моҳ бо қисмҳои баробар баргардонида шаванд.
Дар баробари ин баргардонидани маблағҳои барои ин мақсадҳо аз ҳисоби Фонд ба бонкҳои тиҷоратӣ ҷудошуда мутаносибан ба мӯҳлати пардохти қарзҳои имтиёзнок дароз карда мешавад.
8. Ба баъзе қарорҳои Президенти Ҷумҳурии Ӯзбекистон ва Ҳукумати Ҷумҳурии Ӯзбекистон мутобиқи замима тағйироту иловаҳо ворид карда шаванд.
9. Агентии иттилоот ва коммуникатсияҳои оммавӣ, Ширкати миллии телевизион ва радиои Ӯзбекистон ва Агентии миллии иттилоотии Ӯзбекистон моҳият ва мундариҷаи қарори мазкур, ҳадаф ва вазифаҳои онро дар воситаҳои ахбори оммавӣ васеъ инъикос намоянд.
10. Вазорати молия якчоя бо Вазорати хоҷагии қишлоқ дар муҳлати се моҳ ба Девони Вазирон дар бораи даровардани тағйироту иловаҳо ба санадҳои қонунгузорӣ, ки аз қарори мазкур бармеоянд, таклифҳо пешниҳод намояд.
11. Ба зиммаи вазири хоҷагии қишлоқ Ҷ.А. Хоҷаев ва вазири молия Т.А. Ишметов ҷавобгарии шахсӣ барои таъмини иҷрои қарори мазкур гузошта шавад.
Дар ҳар семоҳа баррасӣ намудани рафти иҷрои қарори мазкур, мутобиқсозӣ ва назорати фаъолияти идораҳои барои иҷрои онҳо масъул ба зиммаи муовини Сарвазири Ҷумҳурии Ӯзбекистон Ш. М. Ғаниев гузошта шавад.
Дар бораи натиҷабахшии чорабиниҳои амалишуда Президенти Ҷумҳурии Ӯзбекистон бинобар ҷамъбасти ҳар як семоҳа хабардор карда шавад. 

Президенти Ҷумҳурии Ӯзбекистон 
Ш. МИРЗИЁЕВ

Шаҳри ТОШКАНД,
10 ноябри соли 2021.