Котиби генералии Иттиҳоди Давлатҳои Мустақил Сергей Лебедев, ки ба мамлакатамон бинобар интихоботи депутатҳои Палатаи қонунгузорӣ ва шӯроҳои маҳаллӣ омадааст, дар мусоҳиба бо вакилони ВАО бо қаноатмандӣ такомули муттасили қонунгузории интихоботӣ, фаъолнокии интихобкунандагон ва дар байни номзадҳо беш аз 40 фоиз ҳузур доштани занонро таъкид кард:

– Ҳайати нозирони дарозмуддати Иттиҳоди Давлатҳои Мустақил аз 25 сентябри соли ҷорӣ корро оид ба мушоҳидаи омодагӣ ба интихобот шурӯъ намуд. Омӯзиши онҳо дар Комиссияи марказии интихоботӣ, комиссияҳои интихоботии ҳудудӣ ва қитъаҳои интихоботӣ баргузор гардид. Аз 16 октябр ҷараёни пеш аз мӯҳлат овоздиҳӣ сар шуд ва мо донистем, ки дар ин ҷараён беш аз 1 миллион нафар шаҳрвандон иштирок намудаанд. Ин аз фаъолнокии интихобкунандагони Ӯзбекистон, аз таваҷҷуҳи онҳо ба номзадҳое, ки ба парлумон интихоб хоҳанд гардид, гувоҳӣ медиҳад. Мо бо баъзе тағйироте, ки ба қонунгузории интихоботӣ дохил гаштаанд, шинос гардидем. Коршиносони Кумитаи иҷроияи ИДМ, Ассамблеяи байнипорлумонӣ шоҳиди он гардиданд, ки сол то сол қонунгузории интихоботии Ӯзбекистон такмил меёбад. Бо қаноатмандӣ таъкид кардан мехоҳам, ки дар Ӯзбекистон рақамҳои дақиқи (40 фоиз) иштироки занон дар интихобот ба мақомоти намояндагӣ мушаххас гаштаанд. Чунин низом дар Озарбойҷон ва Русия низ вуҷуд дорад. Аз ҳама муҳимаш ин аст, ки дар парлумон ҳузур пайдо намудани шахсони соҳибваколате, ки азми интихобкунандагонро татбиқ карда метавонанд, манфиати онҳоро ҳимоя намуда, ба беҳгардии сатҳи ҳаёти халқ мусоидат мекунанд. Мехоҳам инро, ки бисёр бамаврид аст таъкид кунам. Ҳар дафъа ба Ӯзбекистон омада мо гувоҳи бозсозиҳои мусбат дар ҳаёти ҷумҳурӣ мегардем. Намуди Тошканд ва маркази вилоятҳо тағйир меёбанд. Интихобот дар фазои ором ва осуда, муташаккилона ва бо риоя намудани қонунгузории интихоботӣ мегузарад. Мушкилоти пешомада сари вақт бартараф карда мешавад. Муҳтарама Комилова, мухбири ӮзА.