Мактаби миёнаи рақами 33-юми шаҳри Бухоро бобати таълиму тарбия байни таълимгоҳҳои шаҳри кӯҳна мақоми ба худ хос дорад.
Талабагони ин даргоҳ ба комёбиҳои назаррас ноил мегарданд. Аз ҷумла, шогирди синфи 11-уми мактаб Нодирбек Ӯктамов дар соҳаи технологияи ахбор пешқадам аст.
Ӯ ҳанӯз дар 3-солагӣ бо компутер сарукор дошт. Ҳангоме ки ӯ дар синфи 7 мехонд, барномаи синфи 11-ро, аллакай, аз худ карда буд. Қобилияти фавқулоддаи барномасозӣ ӯро ба академияи «Monday Labs IT»-и шаҳр бурд. Албатта, ба камолёбии Нодирбек муҳити хонадон, пеш аз ҳама саҳми модараш – омӯзгори фанни математика Матлуба Тилавова арзанда аст. Нодирбек ба соҳаи фрилансерӣ машғул шуда, бо ёрии сайтҳо барои худ кори дилхоҳ пайдо кард. Ӯ ҳоло баробари таҳсил дар мактаби миёна мувофиқи онлайн-шартнома корманди фирмаи «Full stack developer»-и Англия аст.
Нодирбек ният дорад, ки баъди хатми мактаби миёна дар шуъбаи иқтисодиёти мактаби олӣ таҳсил гирифта, соҳиби корхонаи барномасозии худ шавад.
А. АВЕЗОВ,
мухбири
«Овози тоҷик» дар вилояти Бухоро.
