Агар аввалҳо мардуми ноҳияи Ҷомбой бо парвариши пахта, сабзавот, картошка машғул шуда бошанд, ҳоло бо навъҳои дигари сердаромади деҳқонию боғбонӣ сарукор доранд.
Онҳо имрӯзҳо бо истеҳсоли пиёз, гулкарам, лубиё, тути заминӣ ва алалхусус тути фарангӣ, яъне тамашк (малина) банд ҳастанд.
Чанде пеш ба ноҳияи Ҷомбой ташриф оварда, бо фаъолияти соҳибкори навовар Ӯткур Абдуллоев аз наздик шинос шудем, ки парвариши тамашк ӯро на танҳо дар вилояти Самарқанд, инчунин дар қаламрави Ӯзбекистон машҳур кардааст.
– Ҳамааш аз парвариши 200 бех тути фарангӣ оғоз ёфт, – гуфт Ӯткур Абдуллоев, – аммо бояд таъкид намуд, ки ҳангоми кор дар Куриёи Ҷанубӣ ва Русия асрори парвариши ин буттаро ёд гирифтам, ки дар зодгоҳ фоидабахш гардид. Агар кас аз рӯйи қоидаҳои агротехникӣ амал намояд, аз як гектар замин то 8-10 тонна ҳосил хоҳад гирифт.
Боиси хушнудист, ки тути фарангӣ дар замини намнок хубтар нумӯъ карда серҳосил мешавад.
Аз меваҳои тамашк, яъне малина мураббо, шарбат ва ҳатто машрубот тайёр мекунанд.
Румиҳо ва юнониҳои қадим аз меваи он барои табобати бемориҳои гуногун истифода мебурданд.
Ҳоло занбӯрпарварон аз гули тути фарангӣ асали хушсифат мегиранд.
– Алишерҷон, маҳсулоти тайёри малинаро кӣ мегирад?
– Аввал дар бозори Самарқанд харидор доштем. Ҳозир мардум аз хона гирифта мераванд. Мизоҷон аз Бухоро, Ҷиззах, Навоӣ, Хоразм ва шаҳри Тошканд ҳастанд.
Воқеъан мо қаламчаҳои тути фарангиро низ ба фурӯш гузошта, даромади хуб мегирем.
Ҳамсоя аз ҳамсоя панд гирад, харбуза аз харбуза ранг – дар ноҳияи Ҷомбой аксарияти мардум бо парвариши тамашк машғул гашта, иқтисоди хешро мустаҳкам мекунанд. Зеро сарвари давлатамон ба тадбиркорон шароити мусоид фароҳам оварда, деҳқону боғбон пулёб шудаанд.
Зоҳир ҲАСАНЗОДА,
хабарнигори «Овози тоҷик»
дар вилояти Самарқанд.
