Дар ноҳияи Кегейлӣ бахшида ба баррасии масъалаҳои рушди иқтисодию иҷтимоии Ҷумҳурии Қароқалпоқистон ҷамъомад баргузор гардид.

Дар оғози чорабинӣ 6 корхонаи нав – «Беруний буғдой кластери» ва «Райхон аппарел»-и ноҳияи Берунӣ, «Коракалпак цемент»-и ноҳияи Кароузак, ки марҳилаи сеюм ба кор медароянд, «ККРаси кемикал»-и ноҳияи Қӯнғирот, «Азимут хотел»-и шаҳри Нуқус ва "Хозагро"-и ноҳияи  Турткӯл ба кор андохта шуданд. Намояндагони онҳо тавассути пайванди видеоӣ дар бораи имкониятҳои худ нақл намуданд. Дар маҷмӯъ, дар ин корхонаҳо 1,1 ҳазор ҷойи кори доимӣ таъсис дода, фаъолияти онҳо ба истеҳсолоти минтақавӣ 300 миллиард сӯм ва ба содирот 20 миллион доллар илова хоҳад кард.

Президент Шавкат Мирзиёев тугмаи рамзиро пахш карда, корхонаҳои навро ба кор даровард.

Иқтисодиёти Ҷумҳурии Қароқалпоқистон пайваста ривоҷ меёбад. Дар давоми шаш соли охир дар вилоят зиёда аз 5,3 ҳазор лоиҳа бо маблағгузории умумии 15 триллион сӯм ба амал бароварда шуд. Шумораи соҳибкорон ду баробар афзуда, 46 ҳазор ҷойи кори доимӣ таъсис дода шуд. Истеҳсоли маҳсулот дар 6 ноҳияе, ки пеш дараҷаи саноат паст буд, 2-3 баробар афзуд, ҳиссаи онҳо  дар минтақа ба 12 фоиз расид.

Умуман, дар ин давра саноати Қорақалпоғистон 1,3 баробар афзуд, истеҳсоли 61 намуди маҳсулоти нав аз худ карда шуд. Аз ҷумла, истеҳсоли маҳсулоти кимиёвӣ, масолеҳи сохтмонӣ, маҳсулоти хӯрокворӣ, бофандагӣ ва дӯзандагӣ, маҳсулоти дорусозӣ бештар аз ду баробар афзуд.

31 августи соли гузашта Фармони сарвари давлатамон "Дар бораи чораҳои иловагии баланд бардоштани некуҳолии аҳолии Ҷумҳурии Қароқалпоқистон бо роҳи рушди босуръати соҳибкорӣ, технологияҳои инноватсионӣ ва инфрасохтор" ва барномаи васеъмиқёс оид ба татбиқи ин ҳуҷҷат қабул гардид.  Мувофиқи онҳо соли 2023 670 миллиард сӯм ва 340 миллион доллар ҷудо шуда буд.

Бо мақсади фароҳам овардани фазои ҷолиби соҳибкорӣ барои соҳибкорон андози даромад, муомилот, андозҳои замин ва молу мулк 2 маротиба кам карда шуда, андози иҷтимоӣ ба миқдори 1 фоиз муқаррар карда шуд. Ба туфайли ин дар ихтиёри соҳибкорони қароқалпоқӣ соле 500 миллиард сӯм боқӣ мемонад.

Бунёди соҳибкорӣ танҳо ба соҳибкорони ин минтақа то 75 дарсади маблағи қарз замонат медиҳад. Чунин имкониятхо ба тараққиёти соҳаҳои саноат такони иловагӣ доданд.

– Мо як халқ ва як давлатем! Тамоми вилоятҳо кӯшиш мекунанд ба рушди Қароқалпоқистон ҳиссаи худро ҳамроҳ кунанд. Ба ҳар як ноҳия вазирон, ҳокимони вилоятҳо, роҳбарони идораву бонкҳо вобаста карда шудаанд.  Самараи ин дар тамоми ноҳияҳо ба чашм мерасанд ва  ин кор боздошта намешавад, – гуфт Шавкат Мирзиёев.

Дар ҷамъомад сарвари давлатамон се ташаббуси навро, ки ба минбаъд баланд бардоштани некуҳолии мардуми Қароқалпоқистон нигаронда шудааст, эълон кард.

Якум, ба ҳар кадоми аз 452 маҳаллаҳои Қароқалпоқистон  ба миқдори 500 миллион сӯм маблағи иловагӣ ҷудо карда мешавад. Барои ин фонди ҷудогонаи дастгирии маҳаллаҳои Қароқалпоқистон созмон дода мешавад, ки ба он соли равон 250 миллиард сӯм гузаронда хоҳад шуд.

Дуюм – ба 38 ҳазор объектҳои истиқоматӣ ва ғайриистиқоматӣ, ки кадастр надоранд, ҳуҷҷати дахлдори моли ғайриманқул тақдим карда мешавад.    

Сеюм, бо назардошти талаботи аҳолӣ имсол 4000 хонаи истиқоматӣ сохта мешавад. Ғайр аз ин, ба сокинони ҷумҳурӣ аз рӯи лоиҳаи замонавӣ барои сохтани 4 ҳазор хонаи индивидуалӣ 4 сотихӣ замин ҷудо карда мешавад.

Дар вохӯрӣ ба масъалаҳои зиёд кардани ҷойҳои корӣ, таъмини амнияти озуқаворӣ, беҳбуди инфрасохтори иҷтимоӣ таваҷҷуҳи махсус дода шуд.

Дар Қароқалпоқистон 72 ҳазор нафар расман бекор ҳастанд. Ҳар сол 43 ҳазор нафар ҷавонон ба бозори меҳнат ворид мешаванд. Бо дарназардошти ин мақсад гузошта шуд, ки 193 ҳазор ҷойи корӣ ташкил карда, Қароқалпоқистон ба минтақаи аз бекорӣ озод табдил дода шавад. Ба ин муносибат имкониятҳо дар корхонаҳои калон ва кластерҳо, дар саноати кӯҳӣ, соҳибкории оилавӣ, хонакорӣ ва кишоварзӣ нишон дода шуданд.

Дар соли 2022 барои таъмини фаровонӣ ва дастрасии маҳсулоти ғизоӣ ба аҳолӣ 6,6 ҳазор гектар замин ҷудо карда шуд. Имсол барои таъмини эҳтиёҷ ба маҳсулоти рӯзмарра, аз қабили сабзӣ, пиёз ва картошка 6 ҳазор гектари дигар ҷудо карда мешавад.

Дар 100 ҳазор гектар дар ноҳияҳои Элликқалъа, Турткӯл ва Берунӣ бо роҳи бетонпӯш кардани канали Бӯстон таъминоти об беҳтар карда мешавад. Дар атрофи майдонҳо дар майдони 3,6 ҳазор гектар каду, ангур ва сабзавот, ҳамагӣ 42 ҳазор тонна маҳсулот парвариш карда мешавад.

Дар 51 мактаби Қароқалпоқистон шумораи талабагон аз меъёр 2 баробар зиёд аст. Бо оби нӯшокӣ таъмин намудани 208 маҳалла ғайриқаноатбахш мебошад. 120 километр роҳи автомобилгард ва 600 километр серодамтарин роҳҳои дохилӣ таъмирталабанд. Бинобар ин қарор дода шуд, ки барои сохтмони муассисаҳои таълимии томактабӣ, таъмири мактабу беморхонаҳо, аз ҷумла барои бо гармӣ таъмин намудани 9 ноҳия маблағи иловагӣ ҷудо карда шавад.

Инчунин оид ба таъмири роҳҳо ва андешидани тадбирҳо ҷиҳати рафъи камбуди неруи барқ ​​дастурҳо дода шуданд.

Намояндагони ҷамъиятии Қароқалпоқистон таъкид карданд, ки расидан ба ин мақсадҳо кори умумист, агар ҳама якҷо кор кунанд, натиҷаҳо боз ҳам беҳтар хоҳанд буд.