Қаҳрамони Ӯзбекистон, Корманди шоистаи кишоварзии Ҷумҳурии Ӯзбекистон, барандаи орденҳои «Эл-юрт ҳурмати» ва «Фидокорона хизматлари учун» Лола Муротова тамоми умри худро ба соҳаи хоҷагии қишлоқ бахшид ва мактаби бузурги худро созмон дод.
Рӯзномахонон хабар доранд, ки дар ҳудуди мавзеи навташкили «Янги Ӯзбекистон»-и шаҳри Фарғона бо ташаббуси Президенти мамлакат мактаби махсуси касбу ҳунарҳои хоҷагии қишлоқи ба номи Лола Муротова ташкил гардид. Дар мактаби мазкур таҷрибаи ғании соҳибкорзан, ки беш аз ним аср дар соҳаи хоҷагии қишлоқ фидокорона меҳнат кардааст, омӯзонида мешавад.
Ин мактаб барои 480 нафар пешбинӣ гардида, дар он кадрҳои дорои маълумоти ибтидоии соҳа тайёр карда мешаванд. Ҷараёни таълим мувофиқи низоми дуал бурда мешавад. Ин маънои 40 фоиз таълими назарӣ ва 60 фоиз машғулотҳои амалиро дорад. Дар муассиса зиёда аз сӣ дарсхона, ҳафт лаборатория, компутерхонаҳо, маҷлисгоҳ ва осорхона мавҷуданд, хобгоҳ барои 150 нафар, толори варзиш, майдончаи мини-футбол ва устохонае, ки дорои тамоми таҷҳизоти зарурӣ мебошад, дар ихтиёри хонандагон аст. Дар инҷо ҳамчунин гармхона ва барои машқу тамрин майдончаи автодром бунёд шудаанд.
– Мақсади мо дар ин даргоҳ тарбия кардан ва ба воя расондани кадрҳоест, ки пайравони муносиби Қаҳрамони Ӯзбекистон Лолахон Муротова бошанд, – мегӯяд директори ин мактаби махсус Гулираъно Холиқова. – Бешубҳа, барои ҳар кадоми мо роҳи ҳаёти устод ибратомез мебошад. Боварӣ дорам, ки мутахассисони тайёркардаи мо дар оянда, нафақат барои вилоятамон, балки барои соҳаи хоҷагии қишлоқи мамлакат кадрҳои шоиста мегарданд ва баҳри гул-гулшукуфии он саҳм мегузоранд.
Дар мактаби мазкур хонандагоне, ки синфи 9-уми мактабҳои таълими ҳамагониро хатм кардаанд, қабул карда мешаванд. Ба мактаб барои кумаки услубӣ расонидан Донишгоҳи давлатии Фарғона вобаста карда шудааст. Ният доранд, ки минбаъд дар муассиса «Мактаби фермерон»-ро низ ташкил намоянд. Дар мактаби махсуси касбу ҳунар аз ҳисоби маблағи супоришгарон курсҳои такмили ихтисоси фермерӣ низ ба роҳ монда шуданд. Хонандагон дар ин ҷо бинобар касбҳои гиёҳпарварӣ, устои азнавкоркарди ахбори рақамӣ, устои таъмири мошинҳои хоҷагии қишлоқ, автомобил, боғбон, чорводор, занбӯриасалпарвар, коркуни агротиҷорат ва трактору мошинронро меомӯзанд. Ғайр аз ин, ба хонандагоне, ки дар шаш самт таълим мегиранд, гувоҳномаи тоифаҳои «В» ва «С»-и ронандагӣ низ дода мешавад.
Дар суратҳо: дар мактаби махсуси касбу ҳунари кишоварзии ба номи Лола Муротова.
Суратгир: М. ҚОДИРОВ (ӮзА).
