Дар рафти мулоқоти Президенти Ҷумҳурии Ӯзбекистон Шавкат Мирзиёев бо ҳайати Иттиҳоди Аврупо, ки 18 апрел баргузор гардид, пешравиҳо дар соҳаи таъмини манфиатҳо ва ҳуқуқҳои инсон, инчунин қадамҳои минбаъда оид ба густариши ҳамкориҳои амалӣ бо институтҳои Иттиҳоди Аврупо баррасӣ гардиданд.

Аз ҷониби Аврупо дар қабул намояндаи махсуси Иттиҳоди Аврупо оид ба ҳуқуқи инсон Имон Гилмор ва намояндаи махсус дар Осиёи Марказӣ Терҳи Ҳакала ширкат доштанд.

Сатҳи баланди кунунӣ ва хусусияти сермаҳсули ҳамкории бисёрҷанба байни Ҷумҳурии Ӯзбекистон ва Иттиҳоди Аврупо бо қаноатмандии амиқ қайд гардид. Алоқаҳои фаъол дар ҳамаи сатҳҳо давом доранд.

Солҳои охир ба шарофати шартҳои GSP+, ки ҷониби Аврупо пешниҳод кардааст, афзоиши босуръати ҳаҷми савдои мутақобила ва шумораи лоиҳаҳои бомуваффақияти сармоягузорӣ мушоҳида мешавад. Илова бар ин, дар самти табодули фарҳангӣ ва башардӯстона чорабиниҳои назаррас баргузор мешаванд.

Намояндагони Иттиҳоди Аврупо бори дигар дар бораи пуштибонии қатъии худ аз стратегияи ислоҳоти бебозгашт дар Ӯзбекистони Нав таъкид карданд.

Ба комёбиҳо дар таъмини ҳуқуқи инсон, рушди ҷамъияти шаҳрвандӣ, баробарии гендерӣ, барҳам додани меҳнати маҷбурӣ ва ва дигар самтҳо баҳои балан дода шуданд.

Аҳамияти референдуми дарпешистода оид ба ворид намудани тағйиру иловаҳо ба Конститутсияи Ҷумҳурии Ӯзбекистон таъкид гардид.

Аз ҷумла, ҷониби Аврупо тағйироти ба нақша гирифташударо, ки таҳкими минбаъдаи кафолатҳои ҳуқуқ ва озодиҳои инсон, аз ҷумла ҷорӣ намудани “қоидаҳои Миранда” ва “Хабеас корпус”, ҳуқуқҳои иҷтимоӣ ва экологӣ, ҳуқуқи ҷавонон, рушди институтҳои ҷомеаи шаҳрвандӣ, мустаҳкам намудани бекор кардани ҷазои қатл ва ғайраро пешбинӣ менамояд, маъқул донист.

Ҷанбаҳои мубрами рӯзномаи минтақавӣ низ мавриди муҳокима қарор гирифта, масъалаҳои омодагӣ ба чорабиниҳои муштараки дарпешистода баррасӣ гардиданд.