Ин тадбир дар вилоят соли 1996 ибтидо гирифта, чоряк аср боз баргузор мегардад.
Ба туфайли ҳамин озмун навъҳои гуногуни харбуза аз қабили «Баргинай», «Амирӣ», «Наботӣ», «Каллабӯрӣ», «Даҳбедӣ», «Шерозӣ», «Гулобӣ», ки дар вилоят хавфи азбайнравӣ доштанд, аз нав эҳё шуданд.
Ба қарибӣ хиёбони фаввораҳои ба номи Абӯалӣ ибни Синои шаҳри Бухоро ва атрофи он намуди идона дошт. Дар ин ҷо барои намояндагони ноҳияҳои вилоят ҷои махсус ҷудо гардида, он ҷо дастаҳои ҳунарии фолклории ин ноҳияҳо дар давоми чорабинии дурӯза табъи ояндагонро бо рақсу сурудҳои дилнишини худ хуш карданд. Беш аз 400 нафар фермерон бо маҳсули дастони полизкорон – 1800 тонна харбузаю тарбузҳои пуршаҳду шакар ба дастархони шаҳриён файз бахшиданд. Дар ин ҷо барои фурӯши меваю сабзавот ва асали занбӯриасалпарварон низ имконият фароҳам оварда шудааст.Ташкилкунандагони тадбир мувофиқи шартҳои озмун-азназаргузаронӣ дар давоми ду рӯз сифати маҳсулот ва ҷараёнҳои бо он алоқамандро санҷида, ба ҳар як иштироккунанда баҳо гузоштанд. Дар маросими тантанавии пӯшидашавии «Сайри харбуза» мутасаддиёни соҳа, роҳбарони секторҳо, деҳқонон, роҳбарони хоҷагиҳои фермерӣ ва аҳли ҷамоат иштирок карданд. Ғолибони чорабинӣ ҳавасманд гардонда шуданд. Аз ҷумла, ғолибони байниноҳиявӣ – Ромитан, Когон ва Вобканд бо яхдонҳои замонавӣ,ба соҳибони ҷои дуюм – ноҳияҳои Ғиждувон, Шофиркон ва Бухоро, инчунин ҷои сеюм – ноҳияҳои Қарокӯлу Қаравулбозор телевизори гаронбаҳо инъом гардид. Байни фермерон ҷои аввал ба роҳбари ҶММ «Султон Алӣ Раҳмат интенсив боғ қурилиш»-и ҳудуди Мустақиллики ноҳияи Пешкӯ Исмоил Бӯронов насиб кард ва вай соҳиби мотосикли боркашони «Лочин» гардид. Ба ҷои дуюм роҳбари хоҷагии фермерии «Элмурод Дӯст-мурод Шаҳриёр»-и но-ҳияи Ҷондор Дӯстмурод Боймуродов ва ба ҷои сеюм роҳбари хоҷагии деҳқонии «Мухторов Шафоғат»-и ҳудуди Чорбоғи ноҳияи Олот Шафоғат Мухторов соҳиб шуданд. Дар тадбир ҳокими вилоят Ботир Зарифов иштирок кард.
Амрулло АВЕЗОВ,
мухбири
«Овози тоҷик»
дар вилояти Бухоро.
