Муҳтарам сарони ҳайатҳо!

Пеш аз ҳама, бо самимият Президенти Ҷумҳурии Озарбойҷон ҷаноби Илҳом Алиевро бинобар дар сатҳи баланд дар шаҳри зебои Боку ташкил кардани конфронси таърихии имрӯза табрик мегӯям.

Мо комилан аз кӯшишҳои фаъоли Озарбойҷон дар васеъ намудани ҳамкориҳои байналмилалӣ дар мубориза бо чолишҳои муосири иқлимӣ дастгирӣ менамоем.

Муҳтарам иштирокчиёни нишаст!

Имрӯз тағйирёбии иқлим ба як чолиши асосии ҷаҳонӣ табдил ёфта, мустақиман ба афзоиши шиддати геосиёсӣ таъсир мерасонад. Масъалаҳои мубориза алайҳи камбизоатӣ, амнияти озуқаворӣ ва энергетикӣ, дастрасӣ ба об ва захираҳо махсусан шадидтар шудаанд.

Мо таъсири онҳоро дар Осиёи Марказӣ сахт эҳсос мекунем. Масъалаҳои иқлимӣ дар беҳтар намудани сифати зиндагии аҳолӣ ва татбиқи стратегияи рушди миллӣ ба монеаҳои нав табдил меёбанд.

Мақсади асосии мо дар чаҳорчӯби Созишномаи Париж – пешгирӣ кардани афзоиши бесобиқаи ҳарорати ҳаво дар минтақа ва нигоҳ доштани он дар доираи 1,5-2 дараҷа дар ин аср мебошад.

Дар ин самт мо дар Ӯзбекистон ба таври қатъӣ ҷиҳати расидан ба бетарафии карбон ислоҳоти бузургро татбиқ менамоем. То соли 2030 мо ният дорем партовҳои газҳои гулхонаиро 35 фоиз коҳиш диҳем. То соли 2050 омодаем ин ӯҳдадориҳоро васеъ намоем. Ният дорем ҳиссаи энергияи «сабз»-ро то 40 фоиз афзоиш диҳем. Кластерҳои автомобилҳои барқӣ ва гидрогени «сабз», марказҳои истеҳсоли энергияи офтобӣ ва шамолиро созмон медиҳем. Дар чаҳорчӯби барномаи «Макони сабз» майдони сабзро васеъ мекунем.

Бо кишварҳои ҳамсоя Стратегияи иқлимии минтақавиро амалӣ менамоем. Дар ин рӯзҳо созишномаи бисёрҷонибаро оид ба интиқоли энергияи «сабз» ба Аврупо имзо мекунем.

Муҳтарам хонумон ва ҷанобон!

Ӯзбекистон ният дорад саҳми амалии худро дар ҳамкориҳои муштарак барои бартараф намудани таъсири тағйирёбии ҷаҳонии иқлим васеъ намояд.

Якум. Муҳим аст, ки кумаки техникии кишварҳои пешрафта ва институтҳои бисёрҷониба ҷиҳати муайян кардани чолишҳои иқлимие, ки кишварҳои рӯ ба рушд дучор мешаванд, васеъ карда шавад.

Дар ин замина пешниҳод мекунем, ки Маркази байналмилалӣ оид ба арзёбии талафот ва зарари иқлим таъсис дода шавад.

Дуюм. Зарур аст, ки барои пешгирии ифлосшавии захираҳои обии фаромарзӣ ва ҳифзи гуногунии биологии устувор равишҳои ягона муайян карда шаванд.

Дар мисоли минтақаи мо мехоҳам таъкид намоям, ки баҳри Арал дар пеши чашми як насл пурра нобуд шуда, фоҷеаи сатҳи сайёра гардид. Мо ҷонибдори таҳияи Эъломия дар бораи ӯҳдадориҳо оид ба таъмини саломатӣ ва бехатарии экологии экосистемаҳои дарёӣ таҳти сарпарастии Созмони Милали Муттаҳид ҳастем.

Сеюм. Бо иштироки сохторҳои пешрафта ният дорем Бонки минтақавии захираҳои генетикиро барои баланд бардоштани устувории рустаниҳо ба тағйирёбии иқлим ба кор андозем.

Ният дорем ташаббуси таъсиси Хаби инноватсионии агросаноатии Созмони Милали Муттаҳидро барои давлатҳое, ки ба баҳр роҳ надоранд, дар кишвари худ пеш барем.

Чорум. Пешниҳод мекунем, ки Иттиҳоди пойтахтҳои иқлимии ҷаҳон барои интиқоли дониш ва таҷрибаҳои пешрафта дар соҳаи рушди устувори мегаполисҳо ва шаҳрҳо, ки аз тағйирёбии иқлим осеб мебинанд, таъсис дода шавад ва форуми аввалини онро дар шаҳри Тошканд баргузор намоем.

Панҷум. Мо мунтазири намояндагони кишварҳои шумо дар Фестивали ҷаҳонии ҷавонони ташаббусҳои рақамии «сабз», ки 15 майи соли оянда дар минтақаи назди Арал – Рӯзи байналмилалии иқлим баргузор мешавад, мебошем.

Муҳтарам иштирокчиёни нишаст!

Бори дигар таъкид менамоям, ки Ӯзбекистон ҳамеша барои муколама ва шарикӣ дар роҳи беҳбудии умумӣ ва рушди  «сабз» омода аст.