ТАҚДИМОТИ КИТОБ

Дар мавриди китоб ва мутолиаи он вақтҳои охир сару садоҳо баланд шуд.

Дар бораи баланд бардоштани қадру манзалати китоб қарору фармоиши Сарвари давлат ба имзо расид. Ба хотири дар ҷомеа ба тарзи оммавӣ ташаккул ёфтани маданияти мутолиа ва китобу китобхонӣ дар тамоми гӯшаву канори ҷумҳуриамон тадбир ва чорабиниҳои зиёд баргузор мешаванд, ки дар баланд бардоштани маданияти мутолиа ва шиносоӣ бо китобҳои тозанашр ба ҷавонон нақши муҳим  мегузоранд. Баҳри иҷрои қарори Президент «Дар бораи барномаи маҷмуи чораҳо доир ба рушди низоми нашр ва паҳн кардани маҳсулоти китоб, баланд бардоштани маданияти мутолиа»  аз 13 сентябри соли 2017 дар ҳокимияти ноҳияи Фориш тадбир баргузор гардид. Дар он маросими тақдимоти китоби нависанда Обиддин Маҳмудов «Фарзанднома» ба амал омад.
Ба ин муносибат аз шаҳри Тошканд як гурӯҳ меҳмонон ташриф оварданд. Онҳо дар бораи аҳамияти китоб дар ҳаёти инсон ҳарф заданд. Тавре ки раиси Иттиҳоди эҷодии журналистони Ӯзбекистон, шоир Саъдулло Ҳаким қайд намуд: «Бо ҳамин ҷуссаи хурд як асари калонҳаҷмро чӣ тавр навишт» гуфта эҳтимол ҳайрон шавед. Муаллиф дар оилаи зиёӣ ба дунё омадааст. Падараш Аббосхон марди порсо, бодину диёнат, модараш Матлуба адабиётдӯст мебошад.
Имом-хатиби яке аз масҷидҳои ҷомеи шаҳри Тошканд Абдуқаҳҳор Қорӣ Юнус дар боби фаслҳои асосии китоб, мазмуну муҳтавои он, вобаста ба ин аз хусуси тарбияву ахлоқ сухан кард. Ӯ аз ҷумла гуфт: «Ахлоқи ҳамида ба ҷомеа ҳамеша суд меовард. Маорифпарвари асри ХХ Абдурауф Фитрат гуфта буд: «Тарбия ҳар қадаре, ки мустаҳкам бошад, халқ ҳамон андоза хушбахт мегардад». Дар ҷомеа мардуми доно бояд қадру манзалат дошта бошад. Зеро дар оятҳои Қуръони маҷид ва ҳадисҳои Пайғамбар Муҳаммад (с.а.в) омада, ки фарди доноро бо нодон баробар накунед».
Ҳунарпешаи халқии ҷумҳурӣ Гавҳар Зокирова пораҳо аз намоишу номаҳое, ки худ нақш бозидааст, қироат кард. Онҳо ҷанбаи панду ахлоқӣ доштанд.
Шоир Минҳоҷиддин Мирзо ба ҳозирин аз эҷоди худ намунаҳо хонд, ки модар, Ватан ва ёрро васф мекард. Ӯ якчанд китобро ҳамчун армуғон аз Иттиҳоди нависандагони Ӯзбекистон ба ҳокими ноҳия Абдувалӣ Мустамов ҳадя дод. 

Анорбой НАЗАРОВ,
хабарнигори «Овози тоҷик».

Вилояти ҶИЗЗАХ.

ТАФСИРИ ХУДРО ГУЗОРЕД: