ҲАМКОРӢ МУСТАҲКАМ МЕГАРДАД

Донишгоҳи давлатии Самарқанд бо 50 мактаби олии дунё риштаи дӯстӣ ва ҳамкорӣ баста, кӯшиш ба харҷ медиҳад, ки ба қатори 500 беҳтарин ва бонуфузтарин университетҳои ҷаҳон дохил шавад.

Чанде пеш як гурӯҳ олимони донишгоҳ ба кишвари Италия сафар намуданд.  
Дар асоси лоиҳаи илмии Эрасмус+-и Иттифоқи Аврупо ба гранти бо арзиши 650 ҳазор евро соҳиб шуда будем, бинобар ҳамин намояндагони Донишгоҳи политехникии Турин дар моҳи майи соли равон ба Самарқанд ташриф оварда, бо фаъолияти донишгоҳи мо шинос гардида, таассуроти хуб гирифтанд.
Олимони самарқандӣ дар назди ҳамкорони худ баромад карда, оид ба комёбиҳои нав ҳисобот дода, таъкид намуданд, ки маблағи грант барои илм ва дониши мукаммал гирифтани донишҷӯён сарф хоҳад шуд. 
Чанде қабл аз ин дар Тошканд 80-умин солгарди таъсисёбии Академияи илмҳои  Ӯзбекистон тантанавор ҷашн гирифта шуд, ки дар он мо низ ширкат варзида, бо ҳамин муносибат табрикоти самимонаи сарвари давлатамонро шунидем. Президенти кишвар мӯҳтарам Шавкат Мирзиёев таъкид намуданд, ки асоси Эҳёи якум ва дуюмро, ки дар таърихи миллии мо нақши равшан доранд, пеш аз ҳама дастовардҳои илмӣ ташкил медиҳанд. Бунёди Эҳёи сеюм, ки мо имрӯз меофарем, бешубҳа,  ба сармояи инсонӣ, илм, инноватсия, кашфиётҳои нав такя мекунад.

А. СОЛЕЕВ, доктори фанҳои 
физика-математика, проректори Донишгоҳи давлатии  Самарқанд. 

ТАФСИРИ ХУДРО ГУЗОРЕД: