Ҳашари умумихалқӣ, ки бо мақсади тайёрӣ ба иди умумихалқии Наврӯз, зиёдтар намудани меҳру оқибати байни якдигар ва ҳаммаслакӣ, ободгардонию кабудизоркунии маҳаллаҳою ҷойҳои зисти аҳолӣ таҳти шиори «Маҳаллаи ободу пурфайз – ҳусни диёр» 18 марти соли ҷорӣ дар мамлакат ба амал омад, дар вилояти Бухоро низ бо рӯҳбаландӣ гузашт.
Дар ҷамоати шаҳрвандони маҳаллаи «Зарафшон»-и шаҳри Бухоро ба ин муносибат ҷараёни корҳои ободгардонӣ ва ниҳолшинонӣ сурат гирифт. Дар он роҳбарони секторҳо, садорату корхонаҳо, намояндагони маҳаллаю аҳли ҷамоат бо сардории ҳокими вилоят Ботир Зарифов иштирок карданд. Дар натиҷа қариб ҳазор бех ниҳолҳои мевадору манзаравӣ шинонда шуда, пояи дарахтон бо оҳак сайқал ёфт, ҷӯйҳо тоза карда шуда, гирду атрофи қитъаҳо ба тартиб дароварда шуданд.
***
Дар ин гуна тадбир кормандони низоми садорати маданияти вилоят, 13 шуъбаи шаҳрию ноҳиявӣ, 49 маркази фарҳанг, 18 мактаби мусиқию санъати бачагон, маркази захираҳои ахбори нобиноён, инчунин, ҷамоаи 3 таълимгоҳи ихтисосонидашудаи санъат низ фаъолона иштирок карданд. Дар ҷараёни ҳашар вобаста ба шароит ва иқлими ҳудудҳо 1150 бех дарахтони манзаравӣ, 1244 бех ниҳолҳои боровар шинонда шуданд. Ба ғайр аз ин, қисми муайяни биноҳо, роҳҳо, пояи дарахтон сафед карда шуданд. Ба дарахтон шакл дода, дар қитъаҳо гулҳо корида шуданд. Таълимгоҳу муассисаҳо намуди идона гирифтанд.
Амрулло АВЕЗОВ,
мухбири
«Овози тоҷик»
дар вилояти Бухоро.
