Президент Шавкат Мирзиёев 27-28 июл ба вилояти Фарғона ташриф оварда буд.

. Дар рафти сафар 27 июл дар маросими ба истифода додани даҳ маҷмааи нав дар минтақа ширкат варзид.
Аз ҷумла, шуъбаҳои кардиологияи интервенсионӣ ва кардиоҷарроҳии филиали минтақавии Маркази тиббии ҷумҳуриявии ихтисосонидаи илмию амалии кардиологияи вилояти Фарғона, инчунин бинои 7 ошёнаи филиали маркази илмии ёрии таъҷилии тиббӣ ва бинои қабулу ташхиси навтаъсис ба истифода дода шуданд.
Пас аз сафари Сарвари давлат бо фаъолияти ин муассисаҳои тиббӣ шинос шудем.
Бояд гуфт, ки Сарвари давлат аз рӯзҳои аввали фаъолияти худ ба масъалаи таҳкими саломатии аҳолӣ ва баланд бардоштани сифати хидматрасонии тиббӣ таваҷҷуҳи хоса зоҳир мекунад.
Барои сохтмони шуъбаҳои минтақавии дилшиносии мудохилавӣ ва ҷарроҳии дили бахши ихтисосонидашудаи илмию амалии кардиологияи ҷумҳурӣ дар вилояти Фарғона 24,1 миллиард сӯм маблағ харҷ гардид. Беш аз 32 намуд таҷҳизоти замонавии тиббӣ оварда шуд.  
Барои аҳолии вилоят зиёда аз 60 намуди хидматрасонии мукаммали ҷарроҳии дил фароҳам оварда шуд.  
– Ҳангоми сафари Президент ба вилояти Фарғона шуъбаҳои минтақавии кардиологияи интервенсионӣ ва кардиоҷарроҳии бахши ихтисосонидашудаи илмию амалии кардиологияи ҷумҳурӣ дар вилояти Фарғона ифтитоҳ ёфтанд, – таъкид кард роҳбари Иттиҳодияи нигаҳдории тандурустии вилояти Фарғона Абдуқаюм Тӯхтақулов. – Шифохонаи мо бо таҷҳизоти ҳозиразамони тиббӣ ҷиҳозонида шудааст. Масалан, барои ҷарроҳии дил дастгоҳи гардиши сунъии хун ва дастгоҳи наркози модели нав мавҷуд аст. Дастгоҳи ангиографӣ аз ҷиҳати функсияаш дар Ӯзбекистон ҳамто надорад. Ин дастгоҳ барои бемор ва мутахассис бехатар аст. Бо ёрии УЗИ дар дастгоҳ тоза кардани раг, рагҳои хурди даст ва пойро кушодан мумкин аст. Умуман, имкони ташхис ва тоза кардани рагҳоро медиҳад.
Бояд гуфт, ки қаблан ҷарроҳии дил дар вилояти Фарғона ба амал бароварда нашудааст. Ба беморон лозим меомад, ки роҳи дурро тай карда, ба вилоятҳои ҳамсоя ё Тошканд раванд. Мутаассифона бисёр беморон ба пойтахт намерасиданд. Ҳоло беморхонаи мо имкон дорад, ки ҳама намуди амалиёти ҷарроҳии дилро дар беморони хурду калон анҷом диҳад. Ин шифохона метавонад ба шаҳрвандони на танҳо вилоят, балки вилоятҳои ҳамсоя ва Қирғизистон низ хидмат расонад. Он инчунин ба рушди туризми тиббӣ дар минтақа хидмат мекунад. Дар маҷмӯъ, мо дар як сол зиёда аз 3000 амалиёти баландтехнологиро анҷом дода, метавонем ҳаёти бисёр беморонро наҷот диҳем. 
Барои идора кардани таҷҳизоти замонавии шифохонаи мо мутахассисони баландихтисос заруранд. Барои ин мо аз хориҷи кишвар мутахассисони соҳибихтисосро даъват кардем.
Директори филиал Камолиддин Раҳмонов мутахассиси ботаҷриба аст. Ӯ ҳаждаҳ сол дар Маркази ҷарроҳии бемориҳои дилу раги ба номи Бакулеви Русия кор карда, дар беш аз 7000 амалиёти ҷарроҳӣ иштирок кардааст.
– Баъди ба охир расонидани рисолаи докторӣ ба Ӯзбекистон баргаштам. Шароити ин ҷо, таваҷҷуҳ ба соҳаи тиб ва ислоҳоти пешгирифтаи Президентамонро дида, як ҳамватани дигарамро низ бо худ овардам, – мегӯяд Камолиддин Раҳмонов. – Ӯ мутахассиси ботаҷриба аст, ки давоми 22 сол дар Маркази ҷарроҳии бемориҳои рагу дил кор кардааст. Бо камоли хурсандӣ гуфтан мумкин аст, ки беморхонаи мо барои анҷом додани ҳама намуди амалиёти ҷарроҳии дилу раг имконият ва ҳам иқтидори кофӣ дорад. 
Дар натиҷаи корҳои сохтмон ва азнавсозӣ, ки ба маблағи 32 миллиард сӯм анҷом дода шуд, имкони қабули беморон дар як шабонарӯз дар филиали Маркази ҷумҳуриявии ёрии таъҷилии тиббӣ дар Фарғона аз 150 ба 355-то расид.
– Ба филиали мо 162  таҷҳизоти тиббии 56 намуд ба маблағи 3,6 миллион доллар оварда шуд, – мегӯяд директори филиали Маркази ҷумҳуриявии илмии ёрии таъҷилии тиббӣ дар Фарғона Шералӣ Йӯлдошев. – Бо мақсади расонидани ёрии тиббии таъҷилӣ дар шуъбаи навтаъсиси ёрии таъҷилии шабонарӯзӣ, ки беморонро аз рӯйи дараҷаи беморӣ тақсим мекунад, долонҳо ташкил карда шудааст. Барои беморони вазнин долонҳои сурхи алоҳида, беморони ниёзманди ёрии таъҷилӣ долонҳои зард ва барои ёрии амбулаторӣ долонҳои сабз амал мекунад. Барои расонидани ёрии таъҷилии замонавӣ ба беморон тибқи стандартҳои табобат ва ташхис зали алоҳидаи шок, хонаи хурди ҷарроҳӣ, хонаи табобат, нигоҳубини кӯдакон, хонаҳои алоҳида барои травматолог, нейрохирург, ҷарроҳ, ЛОР, терапевт, лаборатория ва дигар мутахассисон, инчунин барои ба роҳ мондани ташхиси дақиқ ва табобат шуъбаи ташхиси функсионалӣ ташкил карда шудааст.
Муҳимтар аз ҳама, дар натиҷаи муҷаҳҳаз  гардонидани муассисаи мазкур бо таҷҳизоти тиббии замонавӣ 60 намуди амалиёти ҷарроҳии лапароскопӣ, торакоскопикӣ ва эндоваскулярӣ ва усулҳои табобат татбиқ гардида, имкони анҷоми ҷарроҳии баландтехнологӣ фароҳам оварда шуд. 

Зиёдулло ҶОНИБЕКОВ,
мухбири ӮзА.  

Дар суратҳо: 1. Дар бахши минтақавии Маркази ихтисосонидашудаи дилшиносии илмию амалии ҷумҳуриявии Фарғона.
2. Дар бахши Маркази ёрии илмию таъҷилии ҷумҳуриявии Фарғона миқдори қабули мизоҷон аз 150 ба 355 нафар афзуд.
Суратгир:
 М. ҚОДИРОВ (ӮзА).