Президенти Ҷумҳурии Ӯзбекистон Шавкат Мирзиёев 1 май Котиби генералии Иттиҳоди Давлатҳои Мустақил Сергей Лебедевро, ки таҳти сарварии ҳайати нозирон дар ҷараёни раъйпурсии конститутсионӣ дар кишвари мо қарор дорад, ба ҳузур пазируфт.
Сарвари давлатамон ба котиби генералӣ ва аъзои миссияи Иттиҳод барои фаъолияти фаъолонаашон дар тамоми минтақаҳои кишвар, инчунин баҳои баландашон ба рафти баргузорӣ ва натиҷаҳои раъйпурсӣ самимона изҳори сипос намуд.
Дар навбати худ, роҳбари созмони бонуфузи минтақавӣ роҳбар ва мардуми сермиллати Ӯзбекистонро ба муносибати тибқи талабот ва меъёрҳои баланди байналмилалӣ бомуваффақият ташкил намудани овоздиҳии умумихалқӣ самимона табрик гуфт.
Изҳори боварӣ карда шуд, ки натиҷаҳои раъйпурсӣ марҳалаи муҳими бунёди Ӯзбекистони Нав ва идомаи дигаргунсозиҳои демократӣ дар кишвар хоҳад гардид.
Зимни мулоқот аҳамияти платформаи ИДМ барои амиқсозии ҳамкории мутақобилан судманд, пеш аз ҳама дар соҳаҳои тиҷоративу иқтисодӣ, саноатӣ ва нақлиётӣ таъкид шуд. Динамикаи афзоиши сармоягузориҳо дар фазои Иттиҳод қайд гардида, ба натиҷаҳои судманди ҷаласаи Шӯрои вазирони корҳои хориҷӣ, ки моҳи марти соли ҷорӣ дар шаҳри Самарқанд баргузор гардид, баҳои баланд дода шуд.
Ба идомаи минбаъдаи мубодилаи фаъоли башардӯстона низ таваҷҷуҳи махсус зоҳир карда шуд.
